Tukum kitelpi ah kuanzo dinghiam?

Tukum kitelpi ah kuanzo dinghiam?

2020 kum gambup kitelpi kha 4 khawng bek in samlai ahih man in tulaitak dinmun ah azoding ka upmawh hidan hi:

Kawllak Ah

Aung San Su Kyi dam lai aih teh kawl lak ah bel NLD in atamzaw zolai veve in um ing. Nung lamdeuh BBC tawh interview na ah NLD pupi khat ahi U Win Htein’ thugen pawlkhat in 88 pawl hehsak mahmah ahih man in tua in atawm atam NLD thanemsak tuam inteh. Dr. Thet Thet Khaing’ makaih PPP party in zong tawm eu khia zo inteh.

Kawl Ahilote’ sung Ah

Kawl ahilo (non-Burman)te’ sungah bel amau’ minam party ciat 2015 kum laisang in thahatzaw ding cih theihsa hita.

Azenzen in: NLD in 2015 kum lai zah in zo nawnkei henla kumpi phuanzo khop ding dinmun tung nawnkei leh minam party te a mai-et loh phamawh ding hi.

USDP in zong 20% bang angah zawh leh kumpi semthei ding hi. Kawl galkap 25% aomsa hi a, minam party tawm khat tawh kipawl ziau leh kumpi suakthei hi.

Chin State Ah

Chin state ah NLD te 2015 lai zah in hat zo nawnlo ding hi. Tedim ah bel tutung NLD tading in lam-etna tawmkhat om hi. USDP leh ZCD pan candidate ding mi gina a om leh lah NLD te 2015 kum lai mah bang kik ding uh hi.

Paletwa lam ah bel amite ih et teh NLD hoihlai khathei ding hi. Ahi zong in Zakhai galkap te’n nawngkai sak leh kitelna om theilo ding hi.

Chin partyte zong ong hat tading uh hi. Chin party leh ZCD akizolh theih leh Chin state ah lal mahmah ding uh hi.

Zomi Pawl

Kawlpi Ah

Kawlpi ah ahat NLD te’ candidate sungah lah kihel zolo ih hih teh Zomi pawl in hoihtak ngaihsut kul ding hi. Zawh theihna ding mun 2 bang om ahih teh mi gina zonhuai hi.

Tedim Ah

ZCD in Tedim ah gualzawhna ding ahanciam mahmah kul khading hi. Ami in thu onggen tading hi. ZCD akamphatna khat ah NLD candidate sungah mipi huup vanghvangh ding om khollo hi.

Kidop ding ah 2015 kum lai dan in NLD leh ZCD akinak el luat leh akikal ah USDP in aihkei leh migina independent tawh ading khatpeuh in neklawh thei ding hi.

Tonzang Ah

Tonzang ah ZCD leh NLD mah akidem ding pipen ahi hi. NLD candidate sung ih et ciang in state no (1) constituency a luiding Pu Kam Khen Mang bek lam-et om kasa hi. Adang teng 3 in bel ZCD zolo ding hi.

Kidop ding ah ZCD in candidate ding mi gina akoih kei leh alauhuai khat om hi. Adiak in Ah Myo Thar leh Pyi Thut hluttaw te ah ademdingte ngaihsut huai mahmah ding hi. Sianggen leng ih gensa mah bang in NLD te’ candidate te lah lam-et omlo ahih man in ZCD candidate te hong ginat tuankei sawnsawn leh akikal ah khat in luak thei ding hi.

Kei’ muhna hi ei guai. Kinaipen ding a ka upmawh hi ei.

MP term 1 pen kum 5 tak himawk in ih gam ih lei hong khual ding MP ih ngahzawh ding mah lunggulh pen hang mataw !

More: 2020 gambup kiteelpi omtakpi mahding hiam? ~ Bob Tuangpi

• Anhuan khial leng ni 1 ki genthei
• Lozuan khial leng kum 2 ki genthei
• MP telkhial leng kum 5 ki genthei

Lungdam, Mung Laan Thang (Tonzang, Zogam)