Tun sungkhat apiang Zomite kua mah in khen keita hen
A khial omkei, i muhdan akibanglo hizaw. Leitungah mihingte pen Pasian in ama lim le mel sun aa ahongbawl ihih mah bangin hoihna, phatna leh itna, lainatna, deihsakna, citna, siamna leh ngaihsut siamna, gel siamna a kipan minthanna leh vang liantna tawh a kidim sa i hihi. Tua hia, bangzah tak in mikhat ginalo in gamh tat mah leh a lungsimsungtawng ah tua hoihnate tawh kidim mi khat hi veve aa, a kikhel thei mikhat mah ahihi. A hun leh a nai a phukha/tuakkha nailo hilel hi.
Mihingte buaina leh haksatna a tamzaw pen, nektawm ding leh inn le lo silh le ten hang himasa lo aa, khat le khat muhdan sandan kibat lohna hang aa buaina pan hong luang haksat nate a hihi. Banghang in i muhdan leh i sandan kibanglo mawk hiam cih kikum leng ka ut ngeungau hi. I muhdan leh i sandan kibanglo cih tak ciangin i etdan zong kibanglo hikha ding hi. I et kibanglo zong hithei hi. I et kibang kei leh i muh zong kibang theilo ding hi. I muh a kibat loh takcingin i sandan hong kibang lo ahihi. A hizongin i muh kibang gegu aa, i sandan kibanglo cih pen banghang himawk ding hiam???
I muh na kibang napi’n i muhdan, i sandan a kibat loh takcingin buaina lianpi hong om gige hi. Kinialna leh kilang neihnate kipatna hong suak hi. Gentehna khat gen ni, mit limlang bulh mithum om aa, khat in a Eng, khat in a Vom, khat in a San bulh uhhi. Tua mithumte bawn kaang khat en sak lehang, khat in bawng San muding, khat in bawng Eng muding, khat in bawng Vom muding hi. Tua hia, mihingte in zong i puak mit limlang ciattawh leitung en ihih man in i muhdan kibanglo aa, tuapan in i sandan hong kilamdang ahihi. Tua hia, mihing khat ciat in i innpan i puak, i khua pan i puak, i sang pan i puak, i biak inn pan i puak, i minam sung, i beh sung pan i puak leh nu le pa ong piak, siate hong piak, makaite hong piak, lawm le gual ong piak mit limlang tawh ki en ciat ahih man in nate i hihna dik tatak kimu lo aa, i puak limlang i hong muh sakdan in i mu zaw hi.
Hih mithumte kinial niloh le uh cik mah hun in kisang theilo ding uhhi. Tua a etna uh mitlimlang alak khiat nop kei vua leh a muh dan uh kibang ngeilo ding hi. Tua te beh hidan, tuate khau bel hidan hi, tua minamte bel huaci deuh uh, hua pawlpite bel maci deuh uh, tuapa bel nakhat lua cihte a kipan a kihawm suksuk i mitlimlang te pen tuni dong mah mihing khat ciat in kipua in kizang lai ahih man in i nuntakna te ah ei deihdan leh i utdan in kimakaih zolo in i theih loh kal in i sungah hong uk hong hekhek khat na om gige aa, tua in mite tawh hong kikhen saksak hi mawk hi.
Ka muhdan ka laih zawh mateng in ka sandan kikhel loding aa, ka nuntakna zong kikhel theilo ding hi. Hih mithum teng pen a kinial niloh sang un, khat le khat a mitlimlang uh kikawm in(Negotiate) ki en sak le uh a muhdan uh hong kilamdang ding hi. Den aa, a lawmpa muh dan in hong muthei tading hi. Upmawh thutawh a lawmpa a mawhsak napan in a lawmpan mitlimlang Vom tawh a en a hih lam hong thei ding aa, a kihodan hong kikhel ding hi. Hong kikhawl thei tading uhhi. Bang hang hiam cih leh a man zong a lawmpa muhdan in mutheita hiven. A khatpa in zong tua mah bangin a lawmpa mitlimlang Eng tawh a muh na thu hong tel tading hi. Tua takcingin, a mau gel muhdan leh sandan kibang losak pen a mi hilo aa, a mit limlang puak uh ahih lam hong tel ding uhhi.
Hun khat lai in, papi khat a tate thum tawh gamdaihna pak huan sungah hong pai uhhi. Midangte ahih leh tuhphatte tungah dai tak in a kopkop a hia, khat kia ahi zongin tu in thu kikum leh laisim in om uhhi. Papi pa zong tut nading zongin munkhat ah hong tu aa, a khut nit tawh a taldom sa in kun ngeungau hi. A tate thum pen pakhuan suangah miteng nawngkai sak in awng zalzal uha, ki umsuk ki umto uhhi. A awi khat zong omlo in en nguau-nguau ciat uhhi. A sawtsim takciangin nupila khat ong ki-ip zo nawnlo hiding hiven, heh tak in alungsim sungah, ‘Hih bangbang papi, tate nangawn kem theilo, common sense omlo, zi deih pong, ta deih pong, a kepdan ding zong theilo’ ci’n a vatai gawp dingin hong pai hi. “Hallo!! Sia, abang ci liangtak nahia, na tate tawngbuang ve. Ngaihsutna neinawnlo maw?”, va ci phei hi.
Dawng lai leh a gending bel nasia lua himai, lauh huai lua..,.Papi pa zong a mai aa mittuite hong nul aa, mitang san sesa in hong en to aa, “Sorry, I am sorry” ci’n paikhiat hong sawm hi. Nupila nun zong lamdang sa in, ‘melmul aw, a bangci dan aa, leh’ ci’n ngaihsun aa, “Hehehe! Na khawl dih ve, bang ding aa, paikhia nahia? Ken kong gen pen hehna in la na maw? Hong gen in” ci hi. Papi pa zong kihei aa, “Heh peuhmah keng, ko tumah aa naupangte i nu zato pan han ah kakhak khit uh teh, inn ah kokia bek ciah pah ding utlo kahih man in mihon omna pakhuan hongpai hi ung..kei lah kalungsim kizolo kawmkal leh naupangte lah neulai ahih man un bangmah telnailo aa a awng awng uhhi. Hong maisak in” ci hi. Tua nupila nu zong thakhat in a mittui hong luangin, hong kisik khe mahmah in den aa, hehna thangpaihna mitlimlang tawh a et pen tu in itna lainatna mitlimlang tawh honglaih in hong en theita hi. “Ong maisak in, sorry mahmah ing. Kei bangmah theilo hizaw ing. Ken kong huh theih ding a om hiam?” ci hi. ( Aban zop lai ding)…….
Thuzui/thu um Zomi Christiante aw, tuni a kipan in i pu i pa, i beh i phung, i khua i tui, i lawm i gual leh i siate hong piak, kiphatsakna, ki liatsakna, ki muhdahna, ki etsatna, angsung khualna, ki deidanna, kilang neihna, hehna, thangpaihna, huaihamna, hazatna, duhgawhna, ki thusimlohna, ki haibawlna mitlimlangte khempeuh pai in Jesu hongpiak itna, lainatna leh deihsakna mitlimlang tawh khat le khat ki en ni. Ken bang hong huh theiding ka hia? Ken kongsep saktheih ding a om dia? Bang kisapna nei na hia sanggam? Cih lam ah i dotna te hei ding hihang…(Tun sungkhat apiang Zomite kua mah in khen keita hen)
Mt 5:14-16
Note pen leitung mite-a’ dingin khuavak tawh na kibang uh hi. Mual dawnah a om khua kiseelcip theilo hi.Mei a vak khit ciangin kuamah in lawh khuhlo hi. Meivakna mun sangah koihzaw a, innsung khempeuh
a taangsak hi.Midangte in na gamtatna hoihte uh a muh ciangin vantungah a om na Pa uh min a phat theihna dingun mite mai-ah na gamtat hoihna uh khuavak bangin na kilangsak un.
Peter1 2:12
Gentail mite in note mi hoihlo hi, ci-in hong gensia nuamin mawhna hong zon’ ciangin, note’ hoihna bekbek mu-in, Pasian a hong pai Ni ciangin a phattheihna dingun amaute lakah na gamtatna uh hoihsak tawntung un.
Na khempeuh a semthei Pasian a nei mi in lungneu kei ta hen.
(He who trusts in the Lord shall not be disappointed).
Philipkhaipu
For so long our minds have rested
Blinded and unaware
We have been deceived by our own
Yet, from our slumber we shall arise
One by one, we awaken
That sleeping beast none could tame
Shall once again rule Zogam
Comment piaknop aomleh...