Japan Pangbet Zong Maisak Ding Ci (Matthew. 5: 39)
Mawhna a kimaisak theih nadingin kisikna/ thumna kisam masa hi. No repentence no forgiveness. Christian te pen mawhna a maisak zo dingin a kiging sate ih hi a, ahi zongin nang tungah hong khial hong mawhte in kisikna tawh hong thum loh buangin a mawhna Pasian in maisak lo hi. Pasian le na minamte’ maisak theih loh thu banghangin nang ma’ thu in mawk mai sak na hiam?
Hih Lai Siangtho mun in ong gen nop thu pen mawhmaisakna thu tawh kisai hi masa loin thuhkik loh nading tawh kisai thu hi zaw hi. Do not resist the one who is evil. Mawhna maisak theih nadingin kisikna kisam hi. Hong simmawh hong bawlsia mi khat kisikna tawh hong thum kik kei leh thukkik lo a, Pasian’ ap ding ahi hi. A mawhna hong thum lopi un mawk maisak kei zawin la, thuh kik lohna tawh Pasian’ tungah ap zaw in. Mawk maisak kei in. Maisak theih nadingin Topa’ min tawh hong kuan leh lah a maisak zo lian ding pen Christian te mah ih hi hi. Ahi zongin Stephen in a sih ma-in “Topa aw hih mite in bang hih uh cih thei lo ahih manun, a mawhna na mai sak in” na ci hi. A hun a mun a zia zui thute pen exceptional kici hi. Stephen a si ding hi ta a, a deng lum mite kisik hun ding zong om man lo banah Stephen cih bangdan mite pen a tuam vilvel pian mite ahi uh hi.
Topa Jesuh in hih laimun ah kumpite, palikte, galkapte in migilote, gamtatsiate, mi thatte le gutate maan lo ding ci-in a khaktan hi lo hi (Luke 3: 12-14; Rom. 13: 1-4; 1 Pet. 2: 13-14). Jesuh in a gennop thu in, mimal khat le khat kikal ah kithuhkik pahpah loh ding thu a gen ahi hi. Matt. 54: 38na ah mittang khat tang mitang khat, ha khat tang ha khat tawh thuhkik ding kigen hi. Mihing khempeuh pen a thukkik lianlian nuam vive ih hihna kilang hi. Tua ahih manin Jesuh in thukkik kei un, na ci hi. Thuhkikna in Topa a’ ahi hi ci-in zong Romans 12: 19na ah na gen hi.
“Mi khatpeuh in na pang taklam ong bet leh”
Leitung ah takkeh (right handed) pen a kizang pen ahi hi. Mi khat in na pang taklam a khut taklam tawh ong beng leh a khut pualam in na pang ong sukha masa dinga tua khit ciangin a khut sung lam tawh hong beng kik thei pan ding ahi hi. A khatveina “phek” hi dinga, a nihveina “phak” hi ding hi. Tua pen Japan pangbet ahi hi. Mihingte pen a nihvei bet ma-in a kithuk kik nuam pahte ih uh hi. Judah mite’ ngeina ah mi khatpeuh in a khut taklam tawh na pang taklam ong bet leh tua pen simmawhna ahi hi. Simmawhna tawh ong bet banah hehna tawh hong bet behna (tua Janpan pangbet) nangawn ah thukkik kei in, cihna ahi hi.
“…a lang khat zong na dawh lai zaw in”
Mi khat in a taklam khut tawh na pang taklam ong beng leh ong koi ci bet ding cih na mitkha ah na mu thei ding hi. Tua bangin ong bet khitteh na pang langkhat zong dawh lai vet zaw in, ci-in Topa Jesuh in ong hilh hi. Khatvei betna “Phek” nihvei betna “phak” “phek – phak” ci-in ong beng zongin thukkik nai kei in, a ci ahi hi.
Thukkik lehang hong nak vuak zaw lai ding uh hi. Tua ahih manin thuhkik loh hoih zaw hi. Ahi zongin a kilawm ding zah val a, kivuak kisaatnate le kisimmawh suangdalkinuainetnate ah thuak tentan ding hi lo a, eimau le eimau kidaal kihun theih ding (Luke 12:11; 22:36-38; Acts 22:1; 24:10), ahih kei leh taikhia kihemkhia (1 Sam. 19:10; Luke 4: 29-30; John 8: 59; 10:39; 2 Cor. 11:32-33) cihte a kisapna Topa in ong hilh veve hi. A kilawm lo zah dongin kibawlsiatna le kivuakna ah kidaalna (self-defense) le kihepkhiatna (fleeing from evil) a om theih loh ciangin zawhthawhna kibehlap semsem hi. Failure to resists leads to more serious abuse.
Hong muhdah hong saat hong vua nuamte thukkik loin itna zia tawh thuhkikna ah kidaal kiheepna zong ih kikaal ah a kisam siamna ahi hi (Matt. 5:44; 2239). Topa Jesuh’ ong thuhilhna Lai Siangtho munte pen tua mun mah tawh a kimee mat Lai Siangtho mun dangte ii khaliim nuai ah pilna le ciimna tawh khia a, ih saan ih pom ding thupi penpen hi.
Evan. Suang Dal
Comment piaknop aomleh...