Part II Leitungah laibu ta zolo takpi ding hi
Text: John 21:25 – Jesuh in a’ sep thute tampi tak omlai hi. A sep khempeuh laibu sungah a ban banin a kigelh hi leh, a laibute pen leitungah ta zolo ding hi, ci-in ka um hi.” ©KKT Version®
Part 1na ah, tua Zolai sangah ka kah lai setkaan 1 sungin khuaite in 500 vei kha a’ zap man’ cih up hamsa ka sakna, gen khin ing. Ih phawk kha hiam…! Khuai leltak nangawn in setkaan 1 sung bekin, khazap nasep 500 vei tak sem man’ khin zo ci leng, Vanpi Leipi leh na khempeuh piangsakin, a Bawl a Siampa in setkaan 1 sungah bang teng a semzo siang zen tam! Minit 1 sung bekbekin khuaite in 30,000 vei khazap man’ nasep zosiang man’ cihna hi.
Setkaan 1 nuaisiah Huntehna
Khuai leltak in setkaan 1 sungin 500 bei bang, nasem thei dingin, a piangsakpa in piangsak thei ahih leh, ih lungngaih (Contemplate) theihna dingin, A lam dang lua mahmah leh, tua ih biak Vanglianpa ih theihtheihna dingin Physics (ရူပ) pilna ii huntehna en dih ni.
Theih Ding
Malsimna nambatte tam lua ahihna hangin thatuang (power) tawh kong lak hi. gtn. (10`/10) ahih leh, 1 pen bem 10 ii zuih nambat cihna hi a, a kigelh ciangin 10,000,000,000 hi pah hi.
1. Scientists-te in Setkaan 1, seh 1000 a suah uh teh, seh 1 pen “Millisecond” ci uh hi.
2. Setkaan 1 pen seh billion 1 (1,000,000,000) suahin, tua ii seh 1 pen, “Nanosecond” ci uh hi.
3. Setkaan 1, seh Quintillion (10`/18) suahin, tua ii seh 1 pen, “Attosecond” ci uh hi.
4. Setkaan 1, seh Sextillion (10`/21) suahin, tua ii seh 1 pen, “Zeptosecond” ci uh hi. Atomic themcilik nonote tehna ah kizang hi.
5. Setkaan 1, seh Septillion (10`/24) suahin, tua ii seh 1 pen, “Yottasecond” ci uh hi. Kum Quadrillion 32 hun lai thu hi-in, ih Universe ii pian kum sangin masazaw, uhamzaw lai, ci ta lawmlawm uh hi.
6. Huntehna a tompen pen, ahih ke’h, tulaitak hun tawh a kigamlapen pen, mihingte’ theih bat tawpna in
“Planck Epoch” kici a, (10`/43) kum lai ahi hi.
“Big Bang” (မဟာပေါက်ကွဲမှု) ii a puahkhap khit phet lian pana a piang a kipan hun ahi hi. Tua Puahkhapna Lianpi “Big Bang” lang khat, a’ hia lam teng, Scientist-ten zong cihna ding thei melloin, a kammal ding nei thei lo pah uh hi.
Big Bang na puakkham ngei takpi cih um napi, kua in puakkham sak hi ding hiam, Pasian lo kua hi ding ci nuam lohna uh pen, a Kha mit uh a tawt man’ ahi hi.
Hih Universe a om theihna dingin, pello thu 3 kisamsak uh a: (A) Time (B) Space (C) Matter…kici; 1. Hun, 2. Awngthawl leh 3. Leitang bang dan (Mass) om teitei ding ci napi uh, a Kha pilna uh kihu cip ahih manin
Piancilna 1:1 ah om gai kingkeng kimlai:
- A kipat cilin (Time)
- Pasian in Vantung leh (Space)
- leitung (Mass, Matter) a piangsak hi,
cih mu thei lo, um theilo tazen uh hi.
Thukhu’pna
A diakin Gam 3na-a om, mite in Richard Darwin (UK) thungaihsutna umin, ih Zomite in zong hong um nuam ta uh, khangnote in biakinn tun ding kul hong sa nuam lo pianpian ta hi cih, hong kigen ahih man’in, Lai Siangtho Thu Laigil (Basic Biblical Essence ) khaici ih tuh theih ding, ih mawhpuak hi cih, nuntak pih (Apply) ciat sawm ni! Ih mek lup ziau theih ahi, tua khuaite’ thahatna leh Pasian’ thahatna, pilna siamna a’ kikhaih zia, hilhin theitel sak ni!!! Ka Lungdam, Dr. Thomas Pau Gin Mang (Creation Family, 2020年 6月 23 日)
Comment piaknop aomleh...