Tua Thawhkik Ni (The Resurrection Day)

Tua Thawhkik Ni (The Resurrection Day)

Thawhkikna thu a kilang sak Thuciam Thak: Lungdamna thu in Thawhkikna thu tetti pang hi (Matt.28:1-20; Mark 16:1-8; Luke 24:1-53; John 20:1-21-25). Siampi liante le upate in bel hancing galkapte golhguk uh a, ‘A nungzuite, zanin ka ihmut kalun hong pai-in a luang a gukhia uh hi,’ ci sak uh a, galkapte in zong golhgukna sum sang uh a, a kisawl bangin gamta uh ahi manin tudongin Jew mite lakah tu-a bangin hih thu a kigengen lai ahi hi (Matthew 28:11-15).

Siampite le upate bangin thumaan a seelcip nadingun golhguk nasep a semte le hancing galkapte bangin thumaan genkhia lo-in golhguk sum a sangte gamtatna le zuauphuahna thute Pasian mai-ah a khangkhangin tu-a ih lai sim bangin kisim lel ding hi. Ahihna le ahih lohna thupiangte pen tanghthu (history) ah kilang kik hamtang hi. Na keel luphum hong kilang ding hi. Jesuh’ thawhkikna thumaan pen siampi liante, upate le galkapte kigolhgukna ah kilangkhawm se in, thawhkikna thu kigen hi.

A tumdang Jesuh Khrih’ thawhkikna: Khrih pen Lazarus bangin a si kik veve dingin sihna pan ong thokik pak hi lo hi. Jesuh pen a si kik nawn lo ding a, a thokik masa pen pa hi a, Lai Siangtho in mihing nam sung panin Amah pen gah-masa “firstfruit” a cihna tua thu hang ahi hi (1 Cor. 15: 20, 23). Lazarus a kithawhkik sakna pen ‘Jesuh Pasian hi’ cih a kilah sak nading (authentication) bek ahi hi. Ahi zongin Jesuh pen tulai mitphial siamte bangin lim le nalamdang a bawl manin kamsang maan hi a kici pah hi lo zaw a, kamsang maan ahih nak leh lim le nalamdang bawlna tawh kikip sak hi zaw hi.

Topa Jesuh pen nalamdang a bawl manin Pasian’ Tapa hi a kici hi pan lo a, Pasian’ Tapa ahih manin nalamdang bawl in misite a thosak thei ahi hi. Topa Jesuh pen sikha hi lo a, mihing bangin a kilawng thei Mihing-Pasian ‘the God-Man’ ahi hi (Matt. 28:9; Luke 24:30,39). A thokik Jesuh kilawng thei hi.

Topa Jesuh pen Buddhist te’ gen bangin a hanciamna tawh thokikin Pasian a suak hi lo-a, nang le kei Pasian’ tate ih suah theih nadingin Amah ong kiniamkhiat tawm zawa, Singlamteh tung nangawn ah sih ding a ut hi (Phil 2: 6-11).

Evan. Suang Dal