Thai kumpi te photo meitawh ahalsak khangnote kumtampi thong kikiasak

Thai kumpi te photo meitawh ahalsak khangnote kumtampi thong kikiasak

Thai gamsung ah khangno pawlkhat in kumpi ulian “Royal Portraits” te ii Photo meitawh halsak uh ahih manin, thong kum 3.5 panin kum 11.5 kikal akiading in thu kipia cih AFP pan kiza hi. Tua Royal Portraits meitawh ahawlte pen kumcingnailo naupang 5 leh kum 20 aphakhin 1 hi a, Wednesday (Jan 31) ni in thong kiading in thu akipia uh ahihi.

Thailand pen kumpi te gensiat, zahkona, mindaisakna “Royal Defamation” cihte aom peuhmahleh khauhtak in thu akibawl ngekngek ahihi. Tuaban ah kumpi te innkuan, Royal Family photo tepen Thai gambup muntampi, Billboards lianpipi leh vanzuakna Storefronts cihte akipan innsung cihte ah zahtakna in kisuang kawikawi hi.

Tuabang in Khon Kaen Province sungah Royal Portraits akisuangte hih khangno mi 6 te’n abeisa 2017 May khasung in kheltatna tawh nabawlsia, na suksiatsak sese uhhi. (Vandalism)

Tuabangin agamtatna uhhangin hih khangno mi 6 tepen thukhenzum in khauhtak in thongdaan apia ahihi ci’n Thai Lawyers for Human Rights (TLHR) panin Spokespoerson khatin genkhia hi.

Khangno te lakah kum 20 aphakhinpa leh adang mi 3 tepen Royal Portraits meitawh halna ah nihvei kihelkha uh ahih manin, kum 11.5, kum 7.8 cihbang thongkiading in thukipia cihi.

Adang khangno mi 2 tepen Royal Portraits meitawh halna ah khatvei kihelkha uh ahih manin, kum 3.4 sung thongkiading in thu kipia uhhi.

More: Facebook tungah Thai kumpi te innkuan agensiapa kum 35 thong kiading in thukipia

Thailand gamsung ah “lese majeste law” tawh kizui in King, Queen, Heir, Regent cihte gensiatkhak, kosiatkhak, mindai sakkhak leh kum tampipi thongsung ah kikoihcip thei hi. Nungdiak inzong Facebook tungtawn in Thai kumpi te innkuan agensiakhat kum 35 thongkiading in thu kipiaziau hi.

Thai gamsung aomkha te, Thai tetawh aki thuahkha te’n amau ngeina, amau thupisak, amau zahtakbawl cihte theihpihhuai hi. Sawltak #zomidaily