Trump in Cabinet Minister ding mithum pulak khiatbeh

Trump in Cabinet Minister ding mithum pulak khiatbeh

Nov. 19, 2016: US president thak Donald Trump in ni dangin Muslimte lauhna neihna pen a kilawm theihna/thu ngaihsut theihna (rational) hi a, Islamic ngaihsutna leh geelna (ideology) pen dam lo tawh kibang a, Arab leh Persia gam-a makai ten Islamic ngaihsutna pen a dam lo hi a, damsak ding hi a cih ding uh hi ci-a gen ngei US army general pensen kum 57 mi (kha kik ciangin kum 58 hi ding) Michael Flynn national security adviser dingin guang hi.

July kha in zong Al Jazeera ten a interview na uh-ah Flynn in Muslimte tamna gamte a din’ toh uh hun ta a, na a sep beh uh hun ta hi a cih banah Trump in Muslim galtaite lak loh ding hi a cih zong gum hi. Flynn in US galkap sungah kum 30 val na sem a, 2012 panin 2014 dong director of Defense Intelligence Agency na len a, Iraq leh Afghanistan gamte ah zong galdo in na kuan ngei in, pahtawina Bronze Star kici na ngah hi. Flyn pen Obama’ military leh foreign policy langpang ngiat khat hi a, Russia tawh kitanauna hoih ding a deih mi ahi hi.

Obama in Iran tawh nuclear deal kici thukimna a neih a langpang leh a gensia Rep. Mike Pompeo CIA makaipi (head) dingin seh hi. Tua banah Attorney General dingin Alabama Senator Jeff Sessions seh hi. 1986 in Federal Judge len dingin kiguan’ lai leh Alabama ah State Attorney a let lai-in Jeff Sessions in minam kideidanna kampau na zang ahih manin gensiatna leh mawhsakna lianpi na tuak a, Democrats ten zong huphulh bawl mahmah uh hi.

Trump in zanin Secretary of State len kha thei dinga ki-ummawh South Carolina Governor Nikki Haley kimuh in kamkupna neipih a, US President ten thudot mahmah khatin a neih den uh Secretary of State len lui, Judah mi Henry Kissinger zong kimuhpih in kamkupna nei khawm uh hi. Trump in 2012 in Republican presidential nominee Mitt Romney tawh a kituah lohna uh beisakna dingin zong kimuhpih hi. Flynn leh Trump pen Russia tawh kitaunauna hoih neih ding a deihna hangun security experts pawl khatte na lunghimawh mahmah se uh hi. Al Jazeera and Agencies/The Hindu/ Thang Khan Lian