Thupha bang ci ngah ding ~ Siam Khaute

Thupha bang ci ngah ding ~ Siam Khaute

THUPHA: Zomi te sung ah thupha taktak ih ngaihtheih lohna pen ka lung sung ah hong om mahmah thu nih om hi. Tuate tawm kikum suk ding hi hang.

Pasian na sem ahi a, Mikhat peuhin Thu agen ciangin Thupha kigen hamtang in, Pasian kimuang ki-um in, Christian kihi na pi in, Zomi te in Leitung thupha pen ih ngaihsut zah sangin kisanglo, nuamkisa thei lo hi. Mate 6:33 ah Agamleh adikna zong masak ding Pasian in hong deih a, na zonmasak uh leh tuana kisapte uh kong piakthuah ding hi. Cih kammalte na ki-at hi.

Efesa 6 sung leh thukham 10 ah ih sim takciangin Nu leh Pa zahtak un tuapen na hihding mah hi a, Khapna tawh kizom pah in Zahtakle cin Nakhan sau in, leitung ah nuamsa ding cihna ki-at hi. Nuleh pate pen Pasian in ih leitung thupha sanna dingin ana koih hi a, alung ih kimsak, ih zahtak ding pen Pasian deihna na hi hi.

Isau leh Jacob nuntak na ih et teh NU leh PA tung pan in thupha sang na hi hi. Tua pen Christian khat i ih upna hi a, bek tham loh in, Leitung khempeuh ate upna ah zong om a, Pasian in zong leitung thupha pen Nu leh Pa tung ah akoih ahi hi.

NU LEH PATE

Efesa 6:1-3 1Tate aw, na nu na pate uh thu na man’ding uh Khristian ngeina hi a, ahi ding mah ahi hi.*2-3Thupiakna a lian khat in, “Na nu leh na pa zahtak in,” cihna hi a, khapna thu tawh kizom pahin, “Zahtak lecin nang-a’ dingin thu hong hoihin, leitungah na khan’ a sau ding hi,” na ci pah hi.*

Thupha ih cihpen Namdangte ih etteh Zomi Christiante sangin thupha nasang zaw mawk uh hi bang hang ahi tam. Ih zongeina ih et tak ciangin Nu leh Pate pen en Upen/nau pen, Inn luah penpen in kem hi.

English te nuntakzia ka et teh thupha sang ka sa mahmah hi. Ahih hangin amaute in Nu leh Pa pen ei Zongeina danin kem khoi cih pen tawm hi. Amau ngeina ka et teh Ganhing vasate tawh ka tuat hi. Kum 18 acin ma atate uh hoihtakin kem in khoi uh a, kum 18 ahong cinciangin atamzawte in anu leh apa thudon lo, or inn pan in tai khia in atuam ah om tam mahmah ahihding mah inzong ngaihsun mawk uh hi. A nutek Patek en ding om lo, ahih kei leh a et or kol nop kei uh leh Pitek putek kepna ah koih ziau mawk uh hi. Hih dan pen amau ngeina dan ahih manin, Anu leh apate in zong atate tawh kinem lua lo in, atate vak, kep leh khoi dingin zong kingaihsut lohna ciang nei lel mawk uh hi. Tua ahih manin Tate tung ah khasia, lungkim lo cih pen hong tawm zaw thamtham hi.

Zomi te ih hih leh Inn luah pen in kep dingin kingaihsun a, mote leh Inn luah upen in akep ding mah in Nu leh pate zong kingaihsut uh hi. Tua mah bangin nauzaw lamte in kei tavuan, mawhpuak hi kei ci in nuleh pate thudon lo-in kihei mang hi. Ahih hangin akempen in Lungkimsak zolo, Khasia sak zawtham ahih manin tua akhasiat, agilkial, alunglen uh ciangin Tua akempen mo leh upentung bek ah hong khasia lo-in ta hi zah nei in a hong don kei si uh e, cih ngaihsutna leh kampau hong nei in ih minte uh hong lo thei a, naneu lai inhong gim pih mahmah hi ve ung maw?

Cih kammalte leh khituite hong luanteh, tua akem upen bek hi lo-in akem vet lo akiang a omlote na ngawn tung ah ong khasia uh ahih manin, tuakhasiatna kam leh mittuite hangin atate in kamsiatna in kinei mawk hi. Akem pa bek tung ah khasia lo in, ka taten hong itlo cih kam mal in, unau khempeuh tung ah daupaina sangin, kamsiatna hong tun lawh zaw hi.

Tua ahih manin khatbek mawhpuasak lo-in unau teng khempeuh I mawhpuak, tavuan in nei in, ih nu leh pa pen adam laiteng katavuan kakha siatsak loh ding hi cih ih lungsim uh ah ih koih ding uh thupi mahmah ding hi. Upen bek ih mawhpuaksak uh takciangin, amau na lungkim sak zolo uh ahih manin tuakhasiatna pen amauteng tungbek ah tung lo in, sanggam khempeuh tung ah hong tung hi cih phawkleng deih huaisa ing.

Englishte bel ih gensa mah bangin A Nu leh Pate uh tate tung kinem lo limlim uh ahih manin atate tung ah khasia tawm hi. Tua hangin bang zahta in a gamtat dante uh kihhuai in, thupha ngahhuai kei phial ta mah leh thupha a sanna uh pen nu leh pate atung vuah khasia lophotphot ahih man hidingin ka mu hi. USA te nuntak zia pen en leng, 75% te pen zawlta hi kici hi. Ahih hangin thupha pen eite sangin asan zawkna uh Nuleh pate atate tungah kinemlo in khasia lo uh hi.

2. SIATE KIKHASIA SAK

Zomite sung ah ka etet ciangin thupha ih san theih lohna uh pen Siate Biaknasiate kikhasia sak mahmah in ka mu hi.
Gamlakvakna 18:20-32 ciang ah ih sim suk ciangin kitel mahmah hi. Kuate go, tan ding akipia cih kitel sitset hi. Azatna ding gen kul lo-in kitel pah hilo maw maw?

Tang 21″Kikhopna buk sungah amaute’ nasepna thaman dingin Israel sunga sawmah khat khempeuh, Levi mite’ tungah gamh-in ka pia hi.
Tang 24Bang hang hiam cih leh amaute in biakna-in Topa’ tungah a piak uh Israel mite’ sawmah khat pen Levi mite tungah luah dingin ka pia khin hi. Tua ahih ciangin Israel mite lakah amaute in luah a neihloh ding uh ka gensa ahi hi,” a ci hi.

Ei gamlam ah ka om lai in upate in siate tungah thu aneih mahmah lampen ka mu ka tel mahmah hi. Ahi zongin keileh kei in LST simin mite nuntak zia ka et koikoi ciangin ei te atawh hong kileh bulh pian mawk hi. LST in muntampi ah sawm ah khat pen Tanh or gamh, go dingin anasem levi or siate tung ah ana piak hi a, ahih hangin ei Pasian akici zong athei melmel lote in ukna za ih ngahtak ciangin ih siate bang upate nuai ah kikoih zaw sawp hi.

Jesuh pen anung zuite sangin Niamzaw ngei lo a, anungzuite zong Jesuh sangin sangzaw ngei lo hi. Kungfu master khat pen anuai asinte sangin niamzaw lo a, a sinte zong asiapa sangin sangzaw siamzaw cih om ngei lo hi. Follower te pen Master patung thunei cih mawklimlim ih nuntakna uh na hi a, Siate bang sum ih piakteh ih vaksa danin ih ngaihsun thei uh hi. Pasian vak, leh piak ahih lam Malakhi leh Gamlak vakna te simleng kitel sitset hi.

USA ah ka tun ciangin Baptist mah ka zong pah a ka kikhawm hi. Akikhopzia uh leh athu luan zia ka etet ciangin, kikhop hun sung khempeuh zong Pastor pa in hun ama deihbang in zek in hunpi aman khit teh, thuzaksak na hong a, upa laiat pa hong dingin thuzak sak ding Xmas dingte hong thei sak hi. Tua khit teh hun man na dingin siapan thungei in man ziau hi. Tua lo pawldang Methodist, AG leh Living Water cihte ah ka kikhawm zel a, ka va lihlaa/en koikoi a, Pawl paizia pen kibang vek lel hi.

Sia Hau Go adam lai a athu gen khat hong phawk sak mahmah hi. Ei sung ah Democracy cih pen kizang thei taktak kei veh aw, Nam dangte Westernte ahih leh bel mipicing khin thu ngaihsun thei khin, khinkhai thei in ahih ding leh lo ding thei khin in amau adingin ahoih mah hi. Eisung ah atamzaw thukim na sangin siapa/atawmzaw thukimna, gel na hoih zaw lai veh aw. Cih agen pen man sa mahmah ing. Tua mah englishte in na zang zaw a, Pastor master te tung ah thu navai hawmvava het lo uh hi. Biakna tawh kisai Na khempeuh na aap zaw in, Na pumvak lel uh hi.

Biakinn ka zatna uh Pawlpi bang pen Baptist tem ah hi a, Amawkna in hong kawm uh hi. Vaikhat peuhpeuh ka kisap uh ciangin Pastor patung ka gen uh a, aman he ah cihleh anuai a om UPate in nial ngeilo uh hi. Biakinn bang ka kawm liang uh hangin UPATE tawh khat vei mahmah thukikum in ka kimu ngei kei uh hi. Biakna tawh kisai ah Siapa nakhempeuh muangin ap ngam ziau lelmawk uh hi. Amau tem paina lo Biakna vai pen sai vava ngei lo mawk uh hi. Eite e leh siapa sang sainuam zaw, thei nuam zaw laite hi hang. Ahih mah ding ahitam maw?

Zomite in Biakna siate ih khasiat sakmanin thupha kisang thei lo a, ih daupai zah dingin zong kidau pai zo lo hi cih ka muhna ahi hi. Pawlpi ah siamkhautehi a, mimal mahmah taksa thu ah ih dau pai tawh akibat hangin sawt kikhomngei pha lo mawk hi. Why???

Pianna Nu leh pa it mahmah bang na pi hangin Khasiasak in, Siate ah it mahmah bangna pi hangin Khasia sak ih hih manin tuate khitui naptuite Pasianin mu ahih manin Pasianin na sak pih a, amite in thupha kisang lo hi cih tuni in hong tang ko nuam ing.

Jesuh in: Kei ma mintawh hong pai nau pangno khat tuihai khat asuah mi in thaman ngaihding ci hi.

Jesuh in: ka haksatlai tak, khedap nei lo ka om lai tak, puan silh dingka neih loh lai tak, thawng sung ka om lai tak, kagilkial lai takin nong don kei uh hi. Na ci hi.

Mitein: Cikin tuabangin om na hi hiam Topa aw acih cingin Jesuh in, Kamite tuadan a omte na hih loh manunkeitung hong hih lo na hi uh hi. Na cihsan hi. Note kongthei ngei kei hi. Atom in kong at vat hi. (Matt25:31-46.)

THUKHUPNA

Pianna Nu leh Pa tung, Siate tung ah thupha bawl lo-in keivak sa, ci in khasiasak ih hih manin thupha pen tua khasiatna Biakinn munleh, khasiatna a ngah nu leh pa tung ah thupha hong tung thei lo na hi hi.Tua ahih manin ZOmite aw ih omom na ciat ah ih pianna nu leh pa, azahtak huai Pasian sawltak Siate tung ah na hoih sem in khasia sak kei ni. Tua hi leh Namdante danin thupha ih sang thei ding hi. Asim khempeuhte tung lungdam. Siam Khaute