England ah naungek suakcilkhat alungtang apualam ah om, Operation kibawlsak

England ah naungek suakcilkhat alungtang apualam ah om, Operation kibawlsak

England gamsung ah naupangno asuakcil khat alungtang (Heart) pen apualam ah om cimawk hi. Tua asuakcil naupangngek (Newborn baby) pen Doctors te’n Surgery bawlpah ngekngek uh a, 3 vei Operation akibawlkhit ciangin alungtang aomnading ah ki koihkikthei cih Reuters te’n genkhia hi.

Tua naupangno pen numei hi a, aminpen Vanellope Hope Wilkins kici hi. Asuahcil in alungtang pen apumpi apualam ah aomban ah a awm laizang ah apaisukding Breastbone kici guhzong omlo cimawk hi.

Hihbangdan naupangno pen omngei pakpak hetlo ahih manin, “Extremely Rare Condition” kiciliang a, zatuilamsang mipil te’n hihbangdan tepen “ectopia cordis” ci’n ciamteh uhhi.

England gamsung ah hihbangdan “ectopia cordis” in asuak naupangte lakah Surgery akibawlthei, anungta masapenpen naupangzong hiding kici hi.

Hih naupangno pen asuahhun ani cingnailo in asuak hi a, asuahkhiat laitak in aki at “caesarean section” tawh asuakkhia ahihi.

Nung abeisa kal 3 hunlai in England, Leicester aom Hospital khatah asuakkhia hi a, asuahcil akipan Doctors te’n alungtang “Heart” pen Sterile Plastic tawh kepsak uh cihi. Tua asuahni mahin Doctors te’n Surgery bawlsakpah uh a, alungtang pen aomnadingsan apumpi sungah koihtheih nadingin hanciampah ngekngek uhhi.

Operation akigawm in 3 vei bang kibawl ci a, a awmvang ahukkik nadingin naungek ii avunmah zangkik in ki phopkiksak hi.

Video: Baby born with heart outside body ‘doing well’ – BBC News

Hihvai tawh kisai in Glenfield hospital paediatric cardiologist Frances Bu’Lock ii genkhiatna ah hihbangdan “ectopia cordis” tawh naungek asuak pen ompakpaklo cihi.

Naungek Million khatbang asuahna ah naungek 8 khawngbek hibangdan omthei ci a, aompakpak hetlo ahihi. Tuabang in ectopia cordis tawh asuakte zong asisa in asuak ahih keileh asuahzawh ni 3 sungin asipah cihbang vive cimawk hi.

More: Nausuakding Operation bawllaitak Doctors nih kitawnggawp dihdih

2012 kumsung inzong USA, Texas State sungah hihbangdan in naupangno khat suakkhia in, Surgery kibawl sakpah a, nungtasuak hi. Tua naungek zong numeimah hi a, aminpen Audrina Cardenas kici hi. Sawltak #zomidaily