Suu Kyi President aseptheihloh nading in akigawt hilo ci

Suu Kyi President aseptheihloh nading in akigawt hilo ci

Kawlgam ah Aung San Suu Kyi in President aseptheihloh nading in thukhun akibawl hilo hi ci’n “Military Chief of Myanmar” in VOA te kiangah genkhia hi. Hih thukhun pen Suu Kyi ngimna tawh akibawl hilo cih ahihi.

General Min Aung Hlaing in VOA tetawh Exclusive Interview abawlna tungtawn in agenkhiat hi a, gamdangmi zi ahih keileh pasal aneite in Kawlgam ah President semtheiloding cihpen galkap kumpi te thukhun ahihi. Zi pasal bekthamlo, atate gamdangmi hihna Foreign Citizen alakleh zong President semtheiloding cih Kawlgam kumpi te’n thukhun nei uhhi.

Ih theihsa mahbang in Aung San Suu Kyi ii atate pen British gammi ahi uhhi. Tuaban ah asisa apasal zong British Citizen mah ahihi. Tua ahih manin Aung San Suu Kyi pen mipi te’n bangzahtak in adeihmahmah uhzong in President septheih ngiatlohding in galkapmang te’n athaangsiahsa ahihi.

VOA pan Interview abawlpen VOA Burmese Service Chief Than Lwin Htun hi a, Naypyitaw ah thukidotna anei uh ahihi. Interview bawlpa in General Min Aung Hlaing kiangah tua ahihleh Aung San Suu Kyi tawh maitang kituah in naki mukhawmngei uhhiam cih adotleh tuabang in NLD (National League for Democracy) makai tetawh ki muhkhopding hatsa mahmah hi cihsan pongmawk hi. Banghanghiam cihleh Politics vai ah Suu Kyi tawh ka ngaihsutna uh kibanglo hi ci leltak hi. ZD Sawltak #zomidaily