News In Brief: Thuthak tomkim ~ The Tedim Post (16 Sep)
Chin State, Tonzang Khuapi lutna gate ah Kumpi nasemte, Palik te leh CSO te in nai 24 sung duty in sungtum pusuakte cisa tehna/sitna September 15, 2020 ni akiapn ki nei ding hi, cih thu kiza hi.
2020 Kiteelpi a ni ki khintoh nading in Party 20 valin Union Election Commission tungah laikhak uh cih thu kiza hi.
Shan State, Muse Township sungah Myanmar Army leh Nothern Alliance te kidona hangin September 15 ni-in mipi 200 val inn leh lo nusia in tai uh ci hi.
Myanmar gambup Covid-19 natna ngah te lakah Cidamna lam nasem mimal 70 pha in Rakhine State pan 47 khel hi, ci-in Dr Khin Khin Gyi in gen hi.
September 15, 2020 ni nitak nai 8:00PM hun Myanmar gambup natna kisit 2173 lakah natna nei 203 ki muhbeh a, tulaitak natna ngah 3502, zato tuak 832, a si 35 phata hi.
Brazil gamah sangte akihon kik nading in sang sia/siamah pawl khatin lungphona lak uh ci hi. Natna kilawhna nak khan lua ahihman in Brazil gamah sangte a beisa March kha pan aki khak ahi hi. Brazil gam pen Leitung bupah natna ngah tam pen 3 na hi a, Covid natna hangin mimal 130000 valin sihlawh khin uh hi.
Nepal gamah guah tamluatna hangin mencim gawp a mi 12 si in 21 val mang hi, cih thu kiza hi. A beisa June kha pan September kha dong mencip/guahzukna hangin mi 314 valin sih lawh khin uh ci hi.
More: Zogam makai kiteelna ~ Pu Go Sawm Khup
September 15, 2020 ni Leitung bupah Covid-19 natna ngah Tein 290 val(29,355,527), asi Tein 9 val (930,028) leh adam kik Tein 190 val (19,900,125) phata hi. Source : 7day news, , Eleven Media, The Myanmar Times. Thukai khawm : Lia Lu Lun, Lia Shang Shang.
Comment piaknop aomleh...