Kha khat sung bang Crusade kibawl ding vai nasia takin Facebook sungah hong kitaangko a, tua Crusade bawlna dingin mimal leh kipawlna pan huhna sum a khiazote min leh khua zong hong kigelhsuk ziahziah hi. A ni ding bang ka ngaklah zo liang hi. Crusade cih kammal pen kei theihna ah Protestant hong pianma pek a kammal kizangh khinsa khat a hihi. Tua hunlaiin Christiante leh Muslimte kinaak do mahmah uh hi. Tua kidona pen Christiante in Crusade na ci uh a, Crusade sungah a kihel Christian gaalkap hangsante pen Crusaders kici hi.
Crusade ni hong tun taktak ciangin ka omna pan Taxi saap liangin ka pai hi. Amun ka tun ciangin Crusade pai ding bekbek Hallpi kongmai ah mi na dim phengphang khin uh hi. Lut pah lo in agaal pan tua mipite ka en phot hi. Mipite kizep kipuah dan ka muh ciangin Crusade a om ding lam na za khol kha lo bang hileng “Hi vengah Night Club thupisak ve uh e” a ci kha liang ding ka hihi. Hallpi kongmai ah mi hong tawm pian tak ciangin kei zong ka lut phei hi.
Bombi kigaak leh niiksing teengte ven khit deuh phet a lut phei pah ka hihmanin a kizepna gim namtui vangvang teng huih lakah na thaam a, tua teng ka diik phei kawmkawm hi. Hallpi sung lutsukna kongpi kikaalah mun awngpi khat na om lai hi. Tua sungah Crusade Fund zonna ciin Crusade puan na kizuak a, a deekdeek tawh, a dawpdawp tawh, a kiphumphum tawh mi honpi khat mah na dim phengphang lai uh hi. Crusade puan khat na lei khin ka hihmanin kei bel ka lut suak ziau hi.
Hall sungah Usher te’n maitai takin nong na muak pah uh hi. Tutna hong piak sawm mah uh hiven, ahihang kei deihteelna tawh anawl khat ah dingin Stage tunga P&W makaite lasak leh laam ka en hi. Tulai pau leh “Heavy” peuhmah uh hi. Cidam mellote adingin P&W makai hih ding pen a ngap huai het lo na hi mawk hi. Lawp lua uh ahihmanin Stage tungah kaanteh kaan bang liang uh a, khitui naptui luangsa in taai in diang ziahziah uh hi. A Mike bang uh hong viik uh ciangin ham vauvau liang hi.
A khut viik bang un Davuih in sailing zangh se lo in Goliath na viik hileh tuuk zo mahmah in um ingh. Mipite zong diang ziahziah uh hi. Ka geia ding pa bang khua-ul taak datdat liangin diang a, kei a kihem in ka na buai hi. Amah lah gol ahihmanin a dian kawmin ka khepeek khawng hong tuansuk kha leh kaal khat sung ka thuak khop a ngah ding ka hihi. Kei zong ka hihna ciacia tawh ka diang leklek hi!
P&W hun hong bei a, thu zaaksakna leh a tuamtuam hong kizomto in, a tawpna lam ciangin mimal lasakna hong om hi. Tua khit ciangin Kawlgam pan sum tampi beia kisam thugen siam khat hong dingto in thu hong gen pah ziahziah hi. A thugen kawmkawm in mipite nuisak, kap sak, awng sak, diang sak ziahziah thei mawk hi. Thugen a man kuan ciangin Gup ngah kitel teng leh Zeisu gumpa honpa in a sang thei teng sap khiatna hun hong bawl hi. Hi mahmah lamdang ka sa hi! Mi honpi a mailamah pai phei pah zanghzangh uh a, tutna teng bang hawm gai dektak phial hi.
A pai teng pen naupang hi lo in, nungak tangval leh nupi papi teng hizaw lai uh hi. Ka ngaihsutna ah “Guai aw, Christian a kicih zawh kum 100 a val khin hi liang ta, tu a Gupngah kitel pante leh Zeisu honpa gumpa a asang thei pan teng biakinn a kikhawm tangtang, sumpi leh sehsuah piak a thanuam teng lah himawk uh a! A beisa hun in bang peuh ngaihsun uh a hi tam!” ka na cici hi. Bangbang hileh hih pen Crusade paizia hin teh cih tawh ka kihehnem mai hi.
Hih Crusade ka paina tungtawn a kei leh kei ka kidot thu pawl khat pen;
1). Ih upna leh san dan a tuamtek hinapi bang hangin Crusade hun bek ciangin biakinn khat zangh khawm thei se ih hiam?Crusade loh hun sungin zong hanciam leng e…
2). Ih puatham kizepna leh biakinn pua ah Pasian a neilote banga ih nuntaak ih khuasak hun a om zel sam hangin biakinn sung ih tun taktak ciangin ih lungsim kiukhat pan Pasian kilunggulh mahmah veve hi…
3). Pupa khanga biakinn sung tung dente ih hihangin Pasian ih neih taktak hun pen na sawt nai het lo hi….
Taxi tawh ka ciahna lam tawntungah a tunga thu teng leh a tuamtuam tampi ka ngaihsun kawmkawm hi. Nidang laiin Christian ten Crusade pen Zeisu a um lote lakah na kibawl uh a, tuhun ciangin Crusade pen ei Christiante sung mahah a kibawl na hizaw ta hi. A bawl huai mah na hi takpi ta khong hi!
Zomi Quavadis
Mang Khup says
Piangthaksa a ih ngaihsut mi tampite tua banga, a lungsim a sukkhak deuh ciang gupna ngah ding a hong ki ap phapha te pen, a tamzaw, Hot khiatna ngah taktak ding Kha muanna a nei nailote hi thei kha ding hi. Kha in hong lawp saka, thu in hong kipsak hi. Pasian thu laigil upna leh manna Khamuanna ki ngah thei bek hi, cih kei muhna hi.