Corona Virus, China leh USA (Galpi Thumna kipat sawm)

Corona Virus, China leh USA (Galpi Thumna kipat sawm)

US Kumpipa Donald Trump in Corona Virus pen Sente hong khahkhiat hi ci-in mawhsak hi. Tua virus pen mit tawh muh theih hilo ahih manin malmat ding om thei taklo hi. A ma pianzia mahmah zong Tapidaw Biakna leh America gam bek mah bulphuh pian mawk ahih manin leitung mi a tamzaw in ki paakta khollo hi. A hizongin USA kumpipa hi mawk a hih manin ei Zomi te in facebook pan I ut peuhpeuh I gen ziauziau bangin kampau sap lo a, a gen ma saksak hong maan toto hi.

USA leh Europe gam pawlkhat kipawl in Sen kumpi tungah Corona Virus a khah khiat uh hangin liausum (ေလ်ာ္ေၾကး/zawgyii) a nget uh pen Sen te-in piaksawm hetlo in US galkap te’ khahkhiat hi ci-in ngawh zawsop hi.

Hih thu ah UNO khutnuai a om, leitungbup cidamna kipawlna(WHO) in zong Sente lam ah pang ahih manin USA in a bulphuh hong laih in TAIWAN tuikulh vai hong masuan ta hi. Taiwan pen Sente-in ko gam hi ci uh a, Taiwan leh USA kumpi-in Taiwan pen gamkhat hi ci uh hi. Leitung bup COVID-19 tawh buai in mang bangin a om laitak in Sen galkap te in Taiwan tuikhulh laksawm in Galvan nawnnawn uh hi.

Tu-in Donald Trump in a kuat hong laih ta a, Corona Virus thu gen nawnlo-in Taiwan tuikulh vai thulu masuan in hong zang ta hi.

(1) May 23, 2020 ni a, kibawl ding World Health Assembly ah Taiwan kumpi kihel dingin ngetna nei a, Canada, Thai, Japan, Germany, British, Saudi leh Australia gamte in thukim pih khin hi. (Taiwan kumpi in Senkumpi thusim teng thei khinkhian uh a hih manin WHA ah om leh Sente thugen te nial thei ding uh hi).

(2) WHO in USA te’ ngetna mang zenzen leh Sente heh lua-in ki tom pah ding hi. Taiwan kumpi in lah, “Sente khutnuai ka hi kei uh hi” ci-in May (9) ni-in taangko khin hi. Tua nipan in zong Sen galkap honpi-in Taiwan tuikulh ummcih kipan pah uh ahihi. USA te-in Taiwan kumpi in Corona Virus dona ah hong makaih ding cih lunggulh a, Sen kumpi in ko kihel peuh le ung phazo hi ci-in WHO ah gen hi.

(3) Sen kumpi pa Xi Jinping in Taiwan te-in pulnatna pauhlap in a gam phuhnopna uh hong meet lak leh ka koihkhong kei ding uh hi ci ta hi. WHO a Director pipa Mr.Tedros Adhanom (Ethiopian Microbiologist) in Sen kumpi tawh a ki uitui mahmah khat hi a, USA te ngetna sanglo kha ding hi. Tua sang kei zenzen leh USA in WHO ah kumsim in huhna a piak dinguh Dollar Million 400 pia nawnlo ding hi. Sente in kum khat in million 40 bek huhna a pia a hihi. Sente pen angsung sumbawl a siam ahih ziak in WHO makai te golhguuk tampi pia uh a hih manin UNO thunei te-in Sente zahtaak uh hi.

(4) Tu laitak in Taiwan te kumpipa pen numei hi a, Tsai Ing-wen kici hi. USA tawh kipawl siam mahmah a, Gam tuam din ding a lunggulh, minam it khat ahihi. Tua hangin Taiwan panpih ding USA kumpi lawp mahmah a, Sen kumpi te-in Taiwan laakzawh ding nawh gel mahmah zel uh hi. Tuni mahmah in zong USA Galvan pua tembawpi te South China Sea lam manawh in pai ziahziah ta hi.

(5) Sen kumpi vai-ah a dinpih tawntung North Korea kumpi pa lah tu sung teng mangcip thong hial hi. Mang dide kei mah leh zong Donald Trump in mohbung limci pia khin ahih manin Sente panpih lo ding hi. Europe gam te lah Corona Virus tawh buai in Sente tungah heh cihtak in a heh laitak uh a hihi. Sente a panpih niloh Russia te zong Corona Virus hangin a tultul in si ziahziah laitak ahih manin meeting zong hoihtak bawl thei lo uh hi.

May kha sungin WHO Meeting om ding maw? Galpithumna piang ding cih pen midang te-in ki gen theilo hi. Super Power lutangpi nih te khut sungah om hi. Mikado Pheasant (Vapaal hoih mahmah) kituh in Dragon(Gulsam nei) leh Eagle(Muvanlai) te tuipi leh vantung ah hawk ziahziah ta uh hi. Ei lah antang, sathau, ci leh besan bek mah tawh I buai lai hi Zomi aw…. Kham Suumpi #Ref: Reuters_NikkeiAsianReview