Zomi Nam Ni 2017 Malaysia ah lawhcing takin ki bawlthei

Zomi Nam Ni 2017 Malaysia ah lawhcing takin ki bawlthei

Zomi Nam Ni 2017 pen kumdang te bangmah in Kuala Lumpur khuapi sunga om Chinwoo Stadium ah nopci takin kibawl hi. Hih pawipi sungah Rev. Suan Cin Hau (IZCC-Pastor) in hun hong makaih hi. Tuasung ah la hong makaihsak teng IZCC pawl pi pan Muantuang, MZCC pan Haunu, MBF pan Lunlek, CMF pan Cingboih, ZAC pan Nuucing, ZCF-Kota Damansara pan Alex Muang, ZCF-Canaan pan Marry Nuam te a hi uhhi. A kizomin Rev. Suan Cin Hau in music tumte maitang lahna hong nei hi. Zingsang 11:00 lian ciangin “Tuun Sung Khat Pan Piang” cih la sa ziahziah in hunte kipan hi. Rev. Dai Sim Mang (ZEM-Klang Pastor) in kipat na’ng hun ap thunget na hong nei hi.

Tua khitciangin Zomi Nam Ni Committee President Rev. Gin Do Khup (ZCF-Kota Damansara Pastor) in thukong honna hong nei a, “Tuni 69 vei Zomi Nam Ni muakna ah Australia pan hong zin Dr. James Suan Za Dong, Singapore, Kawlgam leh mun tuamtuam pan hong paite kong muak uh hi” ci in thukong honna ah hong gen hi.

Tua khitciangin Kuala Lumpur Methodist Collage pan Pastor Micheal Moey in Ruth Education Centre Zomi sangnaupang tengtawh Choir dawng nih tawh Zomi Nam Ni muakna hong nei uhhi. 69 veina Zomi Nam Ni a zin mangpi a hong pai Dr. James Suan Za Dong in thugenna hong neih ma-in Rev. Gin Do Khup leh Rev. Thang Do Khen te in ngeina puan “Tanghciing” silh sakna hong nei uh hi.

Zin mangpi Dr. James Suan Za Dong in Zomi nam ni I omna sung pan Zomi leh Chin cih tel genna hongnei hi. Zomite ei leh ei ki uk nuam I hihmanin Sengam pan kawlgam tua pan khamtung gam kitungto hi. Khamgtung gam nagawn ah siahtung, siahphei bei nang ahanciam mahmah Pu Song Theu in hong pankhia hi. Kawlmite in zong Mangkang te ukna nuamsalo uh ahihmanin kawlgam sung minam tuamtuam kikum in, mikang ukna pan suaktak na’ng ci in, ei Zomi te 3 vei kihel in 20 February 1947 kum in Panlong thukimna ah minthuhna nei hi. Zomi Nam Ni 1951 kum pan kipan “Phuan” ahih hang 1947 kum hisak ni cih kipsakna kinei hi.

• Chin leh Zomi cih lamdanna
• Chin cih pen tangthu upna, midang te hong sapna, ei leh ei kigen ngeilo
• Zomi cih pen mikang, Sente in hong ciaptehna uh hi.
• Zomi cih neusak lo a, tangzaitak leh hangsan takin genkhia ding hihang.
• Minamdang te lak ah ei Zomi mah hampha pen hi hang,
• Lai leh pau ah mihampha pen hihang ci-in Zomi leh Chin tawh kisai telgenna hong nei hi.

Tua khitciangin UNHCR pan Miss Joanne in thugenna tomno hong nei hi. “Minam thupi sak nahih na uh, haksatna sungah kihuai zo na hihna uh tuma kum 10 lai in kong theihsa nahi uhhi. Hong lungdam pih mahmah ing ci hi. A kizom in kawlgam sung a minam tuamtuam te amau geinapuan ciat tawh kilakna Zotaang leh Zolia te in hong nei uhhi. Minam tuamtuam kilahna khitciangin lasakna 2016 kum a Idol a khatna Lia Sian Hoih, a nihna Stephen Muan leh a thumna David Kiim in hongnei uh a, tha kingah mahmah hi.

Azom in Zomi Ebenezer Malaysia-Klang pan khangnote in lamna hong nei uh a, a zom ah 2014 Malaysia Zomi Idol a thumna Suummuan, a nihna Siancin leh a khatna Kiithang te in lasakna hong nei to uhhi.

Tuakhitciangin 2015 Malaysia Idol Kikim in hong zomto hi. Azom in Zomi Nam Ni Committee Secretary Sia Khoi Sian Tuang in lungdamkoh thugenna hongnei a, “Khua kipawlna, pawlpi leh mimal tungpan sumtha tawh mapanna, zinmangpi Dr. James Suan Za Dong amah leh a mah lamsap kisik a hong paina leh Music tumsiam Sia Gin, Chitkhai, Mamang leh Cinpi te tawh ih Zomi Nam Ni a ding I hihtheihna ciatpan mapang khopna te lungdamna thu hong gen hi.”

Tua khit ciangin ZEC-Maharajelela pan ngeina lam lahna hong nei uhhi. A zomah Pu Lengtong Pauno in Zomi ka hi cih teti panna leh lasakna hong nei a, “Nimna dildial, So na vingveng” cih la tawh zong hong zomto suakin tha kingah mahmah hi. 2017 kum Zomi Cup Volleyball leh Football gualtungtuangte letsong piakna kineito a, Volleyball a nihna Darkhai, a khatna Ngente in pahtawina hong la uhhi.

Zomi Nam Ni video tuamtuam

A zomin Football pahtawina ah Goal tam khumpen Thangno (Tuipiteam) leh Kap Thawn Lian(Anlanghteam), Alai ah kimawl siampen Pau Kam Cin (Ngente Team), Goal pang siampen Kap Sawm Cin (Anlangh), Nungdal siampen Mung Suan Sang (Anlangh) Maitai siampen Kap Sian Ong (Tuipi Team), Kimawl siampen Mung Kap Thang (Anlangh Team) te a zomzom in pahtawina kipia hi.

Football ah a thumna angah Kapteel, Anihna a ngah Tuipi leh Champion a ngah Anlangh team te pahtawi na kipia to hi. Tua khit ciangin Pu VC Mang in lasakna hong nei hi. Mipi in tha kingah mah mah hi. Tua khit ciangin Mipi khempeuh din sa in “Lunglua lo aw Zogam lei aw” cih lasa in Zogam itna leh lungzuang kawmsa in kisa a, 2017 kum a 69 veina Zomi Nam Ni nuamtak in kizai zaihzaih hi.

Rev. Dr. Nang Lian Khual in thupha piakna tawh Zomi Nam Ni hunte kiman bawl a, ciah nuam nai lopi mah in kiciah hi. Record: Rev. Dal Za Cin (Kuala Lumpur UPC) ZAM iNFO