Tusawng Zomite buaina i etkik ciang- kipuah huai thu tawm…
Zomite social leh politics ah Minam min pua, Minambup huam a kipawlna leh panlakna cihdan i neih liapluap hang mipi in a zahtak leh a khen’ a kaan ngamloh zah ding a mipi’ tung ah a tuang zo, a huai zo mimal, party leh Minam kipawlna omlo ahih lam kilang mahmah hi.
Ei’ mimal ngaihsutna leh panlakna ciang tawh a hih huai ahi lo a i ngaihsut thu le la ong pian ciang “banghang a hihbang piang?” cih, “ahang” zong i ngaihsut ding kisam hi. A deihhuaite phungvuh a thalak kikkik ding a kisap bang in, sepkhialh, khialhkhakna a omte itna leh thukhualna masuan a kipuah kizuun zia ding i ngaihsut, i kigen i kihilh ding kisam mahmah ahi hi.
“Khat le khat kisangsiam ding” cihpen i san’ding san’siam theih ahi hiam cih tung ah kinga mahmah hi. Na khatpeuh ong kilot leh kangtang kiman theilo hi. Khauhtak a aleng nakhat nemtak a man cihbang om theilo hi.
“Minam min tawh nasepna peuhmah tha kipia ding” cihdan unconditional statement pen mipi tawh kisaikha, kisukha vai tampi ah kisangsiam den theilo hi. Nahoih peuhmah in limit leh condition neilo cihbang om ngeilo hi.
Mimal deihna hang a ang-masuan nasepna ah midangte leh mipi minam dong sukha panlakna leh sep le bawl san’siam ding a haksat bangmah in, mimal nasepna leh panlakna khat peuhpeuh ah a kisailo pipi limit leh condition thauhsak a, va ki-bikhiah sak cihbang zong san’hak kisa ciat hi.
Bangbang ahi zong in mipi leh minam sukha zahding nasep leh mapanna peuhmah ah mimal leh kipawlna cihte in a limit neiciat ahih zah in, kipawlna leh mipi kimakaihna in zong ahuam nopzah a ahuai ding leh mipi in a khen’ theihloh, a kaan ngamloh ding zah a ahuai ahuam zo ahih ding kisam hi. Amin puak bek leh tutcip lenlan tawh mipi kikhaktan zolo khuahun hita hi.
Zomite i mimal zia a kipan a dawldawl, a ciangciang a panlakna leh nasepna cihte a kim sipsip in limtak enpha kikkik dih ni. I deihloh leh dik i-sak loh thu le la khatpeuh ong pianciang zong mimal hihna tawh i gamtat i kampau a kipan mipi kipawlna tawh mukpau kampau, gamtat luheek nangawn i khinkhai mahmah ding kisam hi. Kangmei kuangsa mutbeh i batkhak loh ding thupi hi.
Makaite a kipan tangpi tangta numei naupang dong in i lungsim ngaihsutna tawng ah i vom gige ding ngaihsut zia leh tatzia bulkip i neih kisam mahmah hi. Suahtakna pen siikan in a let kei leh ki-palang, ki-lengkek baih mahmah hi cih phawk ni. Saupi leh zaipi khualna tawh mabung ding hanciam ciatni… Zomite/ Pau Khat Suan
Comment piaknop aomleh...