Theih leh upmawh ~ Pau Khat Suan
Mi khempeuh in kuama’ kiang a i gengen seloh, i theih takpi, i theihna tan zong i tel, thuman pawlkhat kinei ciat hi. Bangmah theilo kiuhkeuh cihbang bel om samlo hi. Tuabang mah in kuama’ kiang a i genloh veve mah i theihna tung a kilambeh a valdeuh, a pamdeuh, i upmawh pawlkhat zong om veve hi.
Thu khatpeuhpeuh ah aman, adik i tel sitset pen a kisap leh limtak gen a midangte zong i theihsak ding leh a theikhial kha a om leh lungduai tak a i hilh i gen ding a deihhuai leh a kisap hun omthei zelzel hi. Khatveivei gen masak kul khollo ahih hang a diklopi a a kihilhsawn kha a om man in theihkhialhna leh siatna a piangsak thei ding thute genhuai, kihilh huai mahmah thei hi.
Ahi zong in i theih ciang tel a kiptak dinpih leh a kisam bang a i genkhiat mahbang in, i telban loh i upmawh ciang thute ah thuman a theizaw, a telzaw leh ciantak a ong gen thei a om leh a sin ding leh a zui ding a i flexible ding zong kisam hi.
E’n i tel takpi hilo, i upmawh ciangbek kimlai, ei’ upmawhna pen mi’ theihna sang aman zaw ding bangkhat a i pan teltal mawk leh tua pen a diklo i hi cih ei le ei kitel ding kisam hi.
Thu khatpeuhpeuh mi’ gensawn i zakciang bek tawh kanbehna, sihbehna a omkei leh kitel zolo, theihna kicing zolo hi. I kanbeh, i sinbeh a i telkheh khit ciang bek in adik aman kithei, kitel pan hi. Theihtelna pen information source khatbek pan kicing ngeilo zaw hi.
Zakkhak ngei ciang tawh thukhempeuh a thei khin pah i kisak leh kikhial baih mahmah a, ki zahhuai thei mahmah hi. I tel zah thei sitset a, i upmawh pen kanbeh sinbeh a telkheh ding leh mi’ theihna thupi ngaihsut in, a sinbeh ding a flxible ding kisin huai mahmah hi.
More: Singapore gammakaipi Lee Kuan Yew ii tupa (pasal) in pasal nei
I tel zah thei sitset i hihman in aban ngai, sin, kanbeh ding kigingsa in om den lehang ki hampha zaw hamtang hi. Midangte a hilhsawn ding peuhmah in a tel sitset ciang bek mah hilh a, upmawh thu tawh behlap loh ding, thuman thudik tung ah upmawh sansat behlap khak loh ding lunggulh huai hi. Pau Khat Suan
Comment piaknop aomleh...