Italy ziinling hangin mi 278 si ta: Updates

Italy ziinling hangin mi 278 si ta: Updates

Aug. 27, 2016: Italy gam-a ziin liin’ hangin mi si 278 cing ta, inn ciim-in a vukte hutkhiat lai ding cih pen lametna bei pian ta hi ci-in ulian ten gen uh hi. Ziin ling khit nung ni thum cing ta a, uisiam leh emergency crewte kizangin ziin liing in a nawkna lak panin a nasia pen-a kigen Amatirce khua-ah zan dongin a suakta om lai hiam ci-in nasia takin a zon’ hangun a suakta ding mi mu nawn lo uh hi.

“Na lamdangpi khat hong piang vat ding ahih kei buang leh innciim ten a vuk lawmte kimu nawn lo dinga, ahih hangin kimu nai lo ahih man bek un lei kitoto pong hi. Mi 15 kiim tu dong a omna uh kithei lo a, tuate lakah naupang zong kihel hi,” ci-in Amatrice mayor

Sergio Pirozzi in ci hi. Amatrice khua-a ann saite pen a limna hangin minthang mahmah a, nung kumi Italy gam-a khua etlawm penin kiciamteh hi. Magnitude 6.2 a hat ziinling in a nawk manin tu-in inn kisia lo tawm mahmah a, a vekpi phialin kisia khin hi. Amatrice khua-a innte pen kum lui thei mahmah a, a tamzawte pen kum 100 vive hi a, inn a tamzawte pen ziinliing in a nawk ciangin a siat lohna dinga kilam inn (anti-seismic building norms) a kibawl khiat ma-in a kilam vive ahih manin hih khua-a innte kisia hi.

Italy kumpi in sihna tuak mi 40te tu ni-in Amatrice khua kianga om Ascoli Piceno ah vui ding uh a, kumpi in sihna tuakte thuakpihna in ni khat suunna (mourning) nei ding a, Italy laan (flag) a kim ciangah kikhai suk ding hi. Rome khua-a Civil protection department in zato inn-ah liamna tuak mi 400 kikem a, 40 nasia liam mahmah hi ci hi. A suaktate zong bukna ding kician leh giahna ding leh khawlna ding nei loin om uh a, puanbuk dum-a kibawl sungah a lomlom in giak tiltel uh hi.

Kumpi in ziinling hangin khua kisiate bawlphat dingin kamciamna pia hi. Prime Minister Matteo Renzi in Amatrice kiim-ah ‘state of emergency’ pulak a, donghuhna dingin manlang takin 50m euros ($56m) piak dingin thu pia in in, inn kisiate lam kikna ding leh ziinliing hangin inn kilam kikte a sia thei lo dingin lam kik dingin kamciam thuah lai hi. Source: Reuters

Thang Khan Lian