Tedim tuizawn ki satzansak, lampi bawlna suangte kiguksak

Tedim tuizawn ki satzansak, lampi bawlna suangte kiguksak

Dec 26, 2017 (Tue) zan-in Sakollam veeng AG Laisiangtho sang (BBC) te tuineek/tui pipe na kisatkhap sak hi.Mualpang lamte tuineek/ tui pipe zong sing-at tawh kitan lawmlawm mawk hi.

Mimalvai lungkimlohna /kimudahnate thuhioh tawh kilemna bawl zaw ni. Tui pen mihingte nuntakna thaguipi hi in,i bawlsiat leh a nungguu khauh mahmah kha ding hi.

Thutampi gengen nawn kei ni. Hi bang gamtatana hoihtakpi isak ahih leh eimau thu hi.

Tuinak Puah

Dec 27, 2017 (Wed) ni in Sialtang tuinak 1,2,3 teng tui a tawm ciang lak theih ding in bawlsa (stand by) in ki koihkhol hi.

Sialtang tuinak vekpigawm (4) pha hi. phalbihun leh khuakhalhun simloh tuinak (4) na munkhat bek pan kila hi. Tuinak 1,2,3 te pan lakkul nailo hi.

Sinlai Lingbang Hongdo

Tender ngah company te’n khuasung lampi/ hawklam/ phung etc– hong bawlbawl ta uh hi. A bawlna munte-ah sehnel, suangsi cihte hong koih uh hi. Zanciang tuate namang zelzel thei mawk hi.

Abeisa hunsung zong innpualam/ lampi aa kikhoih pak cycle nangawn mang tawntung hi. Cycle nangawn luppih kulding dinmun zah dong hong suak phial hi.

Khuasung khantoh nading/ mipite phattuam nading leh taangpi aa ding kibawl ahih man in, ngaihsun thei hileng i panpih ding kilawm zawlai hi.

More: Tedim khuapi khantohna le Chin State bup motor hawlte omna mun

Zomite i Pu i Pate hunlai in cihtakna leh thumanna pom tinten aa, a nungtate ihi hi.I Pu i Pa te lungsim hoih leh Zomite lungsim cihtakna leh thumanna honglak Zophualva mindaisak kei ni. Tedim Municipal