Malaysia, Ipoh khuasung innluh guta te lakah palik 3 tak kihel

Malaysia, Ipoh khuasung innluh guta te lakah palik 3 tak kihel

Malaysia, Ipoh khuasung aom innkhat ah abeisa Wednesday (Dec 27) ni in innluh guta damiah te lut uh a, sum honkhat puakhia uhhi. Tua guta damiah te lakah palik azalian “Senior Officer” khat zong kihel cih theStar pan kiza hi.

Wednesday zingsanglam 2am hunpawl in Ipoh, Kampung Rapat aom innkhat ah damiah ataih uh ahihi. Tua guta damiah tepen akigawm in mi 6 hi uh a, tualak ah Police Personnel 3 tak kihel uhhi. Tua palik thumte lakah khatpapen Senior Officer cisawnsawn hi.

Hihvai tawh kisai in palik thunei ahi Ipoh Deputy OCPD Supt Abdul Rani Alias in agenna ah MPV (Multi-purpose vehicle) mawtaw khattawh mi 6 innsung khatah lut uha, palik ka hi uh ci’n innteek te tungah gen cihi.

Tua innteekte innsungah vankham “Drug” honkhat kikoih cih kaza uh ci’n tua damiah te’n gen uh a, mat na ut keileh sum hongpia in. Tua ahih keileh anaipenpen Police Station ah hongki paipihding hi ci’n genkhia uh cihi.

Tuakhit ciangin innsung ah lutsuak in sum amuh khempeuh uh avekin laksak in taikhia uhhi. Sum alaksak avekin akigawm RM12,300 ahihi. Innteek pa’nzong hih damiah te lutvai tawh kisai in manlangtak in Police Report bawlpah hi.

Tuaciang in palik te’n tua guta damiah te zongpah ngeingai uh a, Jalan Tun Sambanthan panin kum 35 aphakhin tua innluh lakah akihelkhat mankhiathei uhhi. Tuazawh asawtlo in Bukit Merah, Ipoh City Centre sungah adang akihel mi 3 matbeh leuleu uhhi.

Tuciangciang damiah mi 4 kimankhin in, tuate khutsungpan inzong sum RM1500 ki ngahkikthei hi. Tuasum tepen damiah ataihna panin angahte hiding in ki ummawh hi.

More: Malaysia guta damiah vaitawh akiman mi 3 te lakah palik nih kihel

Akiman mi 4 tepen Jan 02 nidong Remand tawh kimanding a, “Section 395 of the Penal Code for gang robbery” thukhun tawh thu kibawlding cih kiza hi. Adang aki mannailo mi 2 tezong aki zonsan laitak ahihi. Malaysia palik tezong thuginalo tuamtuam kiza phadiak tawh kibang hi. Sawltak #zomidaily