Vonte ading a kigingsa omden Zuapa (Father’s Day Special)
1992 kum Barcelona a kibawl Olympic Games ah metre 400 tai kidemna ah tai-in gualzawhna ngah dingin lunggulhna le hanciamna tak tawh kihel dingin Derek Redmond zong hong pai hi. Tai kidem toto uh-a Semi-final kidem ding hong hita hi. Semi-final kidemna ah zo le-uh final kah in tua pan gualzawhna medal ngah ding ahi uh hi.
Tua bangin semi-final kidem dingin hong kithawi taktak ta uh-a, a tai hat mi 8 hong kidem ta uh hi. Tai kidem hong kipan ta uh-a, a vekun a hat theih tawp un tai ngeingai uh hi.
Kaamsiatna ci ding ihi hiam metre 150 hong tun ciangin Derek pen a ziatlam khe na sakna tawh(ei pau dan hileh a pheisa tai/ a tansa tai dan/ a khetul thagui na) tai zom thei nawnlo in hong om mawk hi. Bangbang hileh hanciam in tai teitei ning, ci-in a kalsuan hangin na sa lua mahmah ahih manin tai zom thei mello hi.
Tua laitak in mipi sungpan papi khat hong paikhia a, Derek huh ding a sawm hi. Security-te’n zong phallo in na khaam uh hi. Ahi zongin tua papi pa’n nawksuak in Derek a va huh hi. Tua papipa pen Derek ii pa ahi hi.
A tapa kiang a tun ciangin, “A tawp dong i nih in(i pata in) zo suak ni,” ci-in a tapa a liangah kawi in, a kawngah len-a a tawp dong a paipih hi.
Tua bangin patate’ hanciam khopna, kalsuan khopna a muh uh ciangin mipi 65,000-te dingto in khut beng uh-a, khitui luangin a om uh hi.
Hih Games ah Derek in pahtawina le gualzawhna a ngah lianloh hangin hih thupiang hangin leitungah mi tampite in Pate’ ii itna telsiam lawhin a tulmawh ding thupiang/taangthu khat a suak hi.
Lungngaih ding
1). I maban ding hanciamna tawh i kalsuanna ah i phawkkha kei phial zongin ei tawh i Pate’ hong omkhawm den hi(Derek pa’ zong Games en mipite lakah na om).
2). I mainawtna lampi ah lametloh pi, lunggulh masak lohpi i tuk khak ciang eite hong phongin a khut tawh hong lenin hong panpih den i Pate ahi hi.
3). I hanciamna ah thukhun tawh kituaklo, ei ii kalsuanzia tawh kituak kei tase mah leh…tuate awlmawh loin a tate ading ahih naakleh bangbang haksatna, thukham-thukhun tawh a kilehbulh phial zongin hong panpih nuam den i Pate hi.
4). Khitui luangin, lamet bei-in, khasia in i om laitak i khitui hong nulsak, i lamet beina ah lametna thak tawh hong kalsuanpih nuam, i khasiatna ah hong hehnem i Pate’ hi.
5). Gualzawhna lukhu i ngah kei phial zongin kung dong i tun theih nadingin hong hanciampih, hong kalsuanpih nuam den i Pate hi.
6). A khut tawh hong len in haksatna kuampite hong kantanpih nuam den i Pate’ hi.
7). A vonte’ adingina kigingsa in a omden i ZUAPA hi…
Pate itna a telsiam kim dingin laisim mimal kim Topa’n thupha hong pia tahen… Lungdam, Dong Mung NB: A tunga thupiang a telcian nuam, a simbeh nuamte’n google search ah Derek Redmond ci-in gelh le-uhcin sim theih ding, et theih ding tampi om hi…
Comment piaknop aomleh...