Sri Lanka gamsung ah Chinese kop 50 te’n mopawi bawlkhawm ngeingai

Sri Lanka gamsung ah Chinese kop 50 te’n mopawi bawlkhawm ngeingai

Sri Lanka gam ii Capital khuapi ahi Colombo City sungah nupa kop 50 te’n mopawi bawlkhatin bawlkhawm ngeingai uh cih Reuters pan kiza hi. Tua mopawi abawlkhawm tepen Sri Lanka gamsung ah ateeng uh hilo a, China gampan in Sri Lanka gamsung ah mopawi bawlkhawmding in apaikhawm Chinese te vive ahi uhhi.

Tua Chinese Couple kop 50 te’n zanni Sunday ni in Buddhist ngeina, Buddhist Tradition tawh Colombo City sungah mopawi abawlkhawm uh ahihi.

Tua mopawi bawlkhopna “Mass Wedding Cememory” ah akihel nupakop tepen nupa akiteengthak te bekthamlo, aki teengkhinsa, nupa kiciamkhopna aneikik pawlkhatzong kihel uhhi.

Sri Lanka kumpi thunei te’n agamsung ah gamdangmi khualzin Tourists te alunglut nading, azinnop nadingin ahanciam mahmah laitak uhzong hi a, tua tungtawn in hih Chinese Couple kop 50 tezong mopawi nuamtak in abawltheih nading un avaihawmsakuh ahihi.

Mopawi bawlkhawm nupakop pawlkhatte’n Sri Lanka ngeina puan silh uh a, pawlkhat te’n Chinese leh Western puan tuamtuam asilhzong om uhhi.

Tourism Minister John Amaratunga in Reuters te tungah agenkhiatna ah China gampan bekthamlo, adang gamtuamtuam paninzong hih Sri Lanka gamsung ah mopawi abawlkhawmnuam nupakop tampi omding hi ci’n genkhia hi.

Tua hi a, Sri Lanka gampen gamdangmi khualzinzin Tourists te adingin ahoihpen tawlngakna munhoih, Best tourist destination ahihtheih nadingin lampi akihonghong hita hi ci’n genbeh hi.

Sri Lanka gamsung ah kumkhat in gamdangmi Tourist akigawm in 2 Million bang alutden, azinden hi a, tualakah 13% bangpen China gampan ahihi.

China kumpi te’nzong Sri Lanka gamsung ah nasep tuamtuam, Major infrastructure projects tampitak Dollar Million tampibei in vaihawmsak uhhi. “One Belt One Road” project ahzong Colombo leh Beijing pen aki limpawlkhop mahmah, major partners ahi uhhi.

More: Mopawi bawlnading ah Helicopter tawh azuat laitak vanleng kia in monu si

Mopawi abawlkhawm te sungpan in Reuters te tungah agenna uhah, Sri Lanka gampen gamhoih mahmah beautiful country khat hi. A ngeina uhpen lunglut huai in, adiakdiak in Kandyan Dancing akici Sri Lanka gam ii Traditional Dance pen lunglut huai mahmah hi ci’n genkhia uhhi. Sawltak #zomidaily