Taliban te’n Afghanistan ah German Consulate suamsak

Taliban te’n Afghanistan ah German Consulate suamsak

Nov. 11, 2016: Mazar-i-Sharif khuapi sunga om Germante’ Afganistan gam-a Consulate ah bomb zangin zan in kisuamsak a, mi nih a sih banah mi 100 val in liamna tuak uh hi. Taliban ten hih pen tu kha bul in US ten Kunduz province ah tung lam panin khua sung mi 32 a kaplupna uh thuk kikna hi ci-in pulak uh hi. Bomb puah khit phet in thau tawh kikaptuahna piang a, tua German Consulate kiim-a inn tawlet limlangte tampi kisia in, khua sung mite patau in tai vengvung uh hi kici hi.

Local police chief Sayed Kamal Sadat in German Consulate suam pen sihpih bomb puaksak mi hi a, car zangin German Consulate bang phu a, a bomb puaksak hi ci-in AFP news agencyte kiangah gen hi. Taliban spokesman Zabihullah Mujahid in bel a suam dingin kizangpa martyr in si a, Afghan gam hong sim (Germante) tampi (sawm val peuhmah) in sihna tuak hi ci-in gen hi.

Kabul khuapi-a German ulian ten hih thupiang AFP ten a dot hangin dawng nuam lo uh a, Berlin-a diplomatic source in bel hih thupiang hangin Foreign Minister Frank-Walter Steinmeier in Foreign Miinistry ulian teng sam in “crisis meeting” kici sam hi ci hi.

Consulate ah bomb a puak khit phet in Afghan security forces leh Majar-i-Sharif khua-a German galkapte phual Camp Marmal a om Resolute Support [NATO] galkap ten delh in Talibante tawh nasia takin kikaptuah uh hi. Tu zingsang in Afghan ten hih Consulate (ni dangin Mazar Hotel a kici) siansuahna nei uh a, tu zingsang in Helicopterte tua Consulate kiim tungah leng kawikawi lai a, liamna tuakte pua khia dingin ambulance ging (sirens) vengvung lai hi ci-in AFP reporter in gen hi.

Si luang nih kiim kimu ta a, liamna tuak mi 100 val in, liamna tuakte lakah naupang 10 kihel a, tua teng city hospitals-te ah kipuak hi ci-in local doctor Noor Mohammad Fayez in ci a, liamna tuak pawl khat nak liam mahmah uh hi ci-in gen beh hi. -The Hindu/ Thang Khan Lian