Nuntakna kilam ding zia ~ Tg. Samuel Nas

Nuntakna kilam ding zia ~ Tg. Samuel Nas

Khatpa in “Hauhna Thusim” cih laibu khat bawl hi. A thu pen hoih thei lua. Ahih hang a buaihuai thu khat om. Aman a hawmkhiatna ding sum nei lo. 😁 Hauhna thusim a theihte aman zangkhia masa leh bang a ci tam maw? 🤔

Khatpa leuleu in zong, “Lungkia Ken” cih laibu khat bawl. Khawng lo lua aih cianga a tawpna ah amahmah lungkia. 😁

Thukanna pan a kimukhia thu khat pen, US ah siavuan 44% bang pen thau khengval (obese) kici hi. Siavuante i cih cidamna tawh kisai a thei penpen dingte hi. Ahizongin amau zong hoihtak kikep ding cih thei napi in na kikem lo uh hi kha ding hi. A cidamna un thuaklawh.

Bang teng hi leh, thu theihna pen manpha hi. Ahizongin i thu theihte i nuntakpih tuan kei leh a kimanna khat zong omlo zel hi. Hauhna thusim khawng thei keei napi in zawng mahmah leng a kimanna bang om ding a hiam? Hih thu hang mahin James laikhak sungah, “Thu a ngaite bek na hi kei un… a nuntakpihte na hi zaw un” (1:22) na kici hi. A banah simsuk lai leng, thupha pen thu theihna ah hilo in, thu zuihna ah om zaw ahihna ciantakin kigen lai hi (1:25).

Jesu mahmah in zong hih thu mah na limgen hi. Mipil hihna pen thu zakna leh theihna bekah hilo in, a thugente zuihna leh nuntakpihna ah na hi zaw hi (Matt. 7:24). Hih munah Jesu in inn lam nihte tangthu gen a, i inn lam ding zia hong hilh nuam hilo hi. I nuntakna kilam ding zia hong hilh hi zaw hi.

More: Ka lunggulh den khat tangtung ~ Tg. Samuel Nas

Leitung pilna hi in Pasian thu hi ta leh, tampi i theih khit manin mi tungah a kileng hi pah nailo hi. Mite theihloh thusim khawng i theih keei manin a kigualzo zong hi pah nailo hi. A kisam khat na om lai hi. Mi khangcing, mi picing, leh mi lawhcing i cihte pen mikimin i theihluat thute mah hoihtaka ana nuntakpihte hi zaw hi. Ei zong hih dan hilo ding hiam i kilam zia ding? Tg. Samuel Nas