Misi khattawh alumkhawmkhawm Hotel zintung pawlkhat om

Misi khattawh alumkhawmkhawm Hotel zintung pawlkhat om

Hotel ah zintung te’n misi khattawh alum khawmkhawm ahihlam kitheikha hetloding uhhi. Banghanghiam cihleh alupna muaiza nuaiah misi khat Plastic tawh kituamcip in kiselcip cimawk hi.

Mexico gamsung aom Hotel El Senador ah thupiang hi a, Mexico Police te genkhiatna ah hih misi pen lupna nuai ah aki koihcipzawh atawmpen kalkhat phakhinding hi ci’n genkhia uhhi.

Hotel nasem Housekeeping te’nzong mukhia, theikhiapaklo cimawk hi. Anunung ah misi uih gimnam akizak hiauhiau ciangin Hotel nasem te’n mukhiapan uhhi.

Hotel Staff te genna ah hih Hotel Room panin anunungpen zintung te Check Out abawlkhit ciangin agimnamsia khat om cih thei uh ahih manin lupnakhan sungteng zongkawikawi uh a, lupna muaiza adopkhiat uhleh anuai ah misi Plastic tawh akitun phitphet khat mukhia uh cimawk hi.

Plastic ipsung ah numei khat asisa in kituamcip amuh ciangin Hotel nasem te’n Police te sampah uhhi. Thunei te genna ah asi numei pen kum 25 leh kum 30 gualpawl hiding ci uhhi.

Hotel nasem te genna ah hih numeinu pen pasal khattawh hih lupnakhan azangkhawm hiding ci uh a, ahi zongin CCTV tawh ettheihding Video Record bangmah omkhalo cihi. Hih thuthang pen Daily Mail in nung Tuesday ni in asuahsak uh hi a, asi numei leh lupnakhan azatkhoppih pasal pen kua cih kithei cianlo ci uhhi.

Misi khattawh alumkhawmkhawm ahihlam amau leh amau akithei khahetlo Hotel zintung pawlkhat omkhinkhian hihtuak mawk hi. ZD Sawltak #zomidaily