I hihna bangbang tawh i Pa’ kiang zuan ni

I hihna bangbang tawh i Pa’ kiang zuan ni

Pasian leh ama deihna banga nuntak ding mangngilh in, mawhna khialhna sungah bual in, nuamsa in na om kha hiam? Na nuntakna, lungkham haksatna tawh kidim in, dahin kapin lungluang khua ngai in na om kha hiam? Tuni-in Pasian in hih ama kammal tawh nang hong hopih hi.

” Amau mawh gamtatnate a vekin ka mu khin a, ahih hangin amaute ka damsak ding hi. Amaute makaihin ka hehnem ding a, a dah a kapte hehnemin ka lungdamsak ding hi.” Isaiah 57:18

Hi takpi hi Sanggaw aw..eite bangbang in i om zongin hong it lai veve Pasian ahi hi. Ama mi(ama bawlsa) ihih manin Satan khut sungah i om ding pen hong phal hetlo hi. Satan khut sung panin paikhia ta lo ding ihi hiam? Itna awnem tawh hong sam den i Pa’ kiangah ciahkik lo ding ihi hiam?

Kisikkikna tawh Pasian’ kiang i zuat nak leh, amah in si banga san i mawhnate vukbang hong ngosak dinga, i dahna khitui khempeuh lungdamna khitui tawh hong laihsak ding hi. Topa’n ka nuntakna buppi hong khel thei taktak hi cih upna nei-in, Topa’ kiangah ciahkik tapeuh ni.

Nang leh na innkuan sungah hih Pasian’ kammal hong tangtung ta hen. Amen!

Khazih sungah,
David Tuang