UN vai ah kikhemna om zel

UN vai ah kikhemna om zel!

UN Card kihawm ding cih thumaanlo a kithan sakna hangin UNHCR zumpi maiah August ni 11 ni in mipi a tul a sim kikaikhawm zihziah uh hi. Hih thu tawh kisaiin UNCHR thuneipa Richard Towle in Bermana thukante khiang a genna ah “Mi pawlkhat in thu hilolo athansakna uh hangin hih thu a piang hi.

UNHCR vai pen a pai ngei bangin pai in hun hongla ding a bangmah buaina omlo ding hi” cihsan ziau hi. Sun lam ciangin Palikte hong pai uh a amau thupiakna tawh UNHCR zumpi maia kikai khawm mipi tul val te ciahkik pan uh hi. Brickfields palikbopa genna mipi sungah UNHCR Card kihawm kik ding thu kithang sak ahih manin hih thu apiang hi ci hi.

Abdul Rahman akici kalate khat in a genna ah “Kei pen Johor a nasem hi ingh. Phone numbat ka theih ngei loh khat in Rohingya te ading UN Card kihawm ding hong cih ciangin hong pai ka hi hi” ci hi. Thuhaida akici khat leuleu in “Zingsang nai 7 hun in UN Card hawm kipan ding cih thu ka zaak ciangin UNHCR zumpi maiah giahphual a saat vet ka hihi.

Tun ahi leh lamet bei takin a ciahkik ding ka hi mawk ta ve maw” ci ngeungeu ek sam hi. Mipi kikaikhawmte pen Rohingya vive hizaw uh hi. Source : www.bernama.com

(Ei Zomi sungah zong hibanga phone numbat theihlohpi tawh a ki khemkhem leh thumaan lopi a thangsak ki om thei zel ahih manin kidop huai mahmah hi). ZAM Thupuak