Singapore Changi Airport ah nungkhasung in pasal khat palik te’n amatsawm laitak Video kizaihkha in, Social Media tungah kithehzak in minthang mahmah hi.
Tuapa pen Australian gammikhat nahi a, aminpen Jason Peter Darragh akici kum 44 aphakhin khat ahihi. Singapore gamsung ah azinsung in zu khamcip in kumpi thukhun tamveipi zuilo cihi.
Tuahang in akiman hi a, zanni in thukhenzum ah thukhenna thuak in, akigawm in nam 11 tawh thu kibawl cih Straits Times pan kiza hi.
Singapore Police Officer te’n amawhna hangin amatsawm pen kammal ginalo “Vulgar Language” azatna hangin 3 Charges in thu kibawl hi. Tuaban ah Police Officer te thatang hatna tawh lehdokik “Criminal Force” ahih manin, tuahang inzong 2 Charges in thu kibawl hi.
Singapore ah aomsung in khuasung mipi lakah zu khamcip in mipi nawngkaisak ahih manin, 2 Charges in thu kibawl hi.
Khuasung pasal khattung ah kammal ginalo azatna leh Police Officer khattung ah agitloh gamtatna cihtawhzong thu kibawl hi. Tuaban ah khuasung mipi muhna ah zu khamden in, lu leh taw zong selzololiang in aomna hanginzong thu kibawl hi.
April 20 ni in Singapore Changi Airport Terminal 2 sungah sunlam 12pm khitpawl in buaina piangsakgawp a, YouTube ahzong kikoih ngeingai in ki limet mahmah hi.
Video etnopleh: Aussie bogan fights police officers at Singapore Changi Airport
Pasal khat ii Mobile Phone paihsak in kammal ginalo tawh kogawp, Police Officer te sawntuk in kobawlgawp cihbangin gitloh gamtatna tamveipi neimawk hi.
Azingciang inzong Clarke Quay aom McGettingan’s CQ Bar maiah zukhamsa in tucip in mi nawngkaisak mahmah hi.
April 26 ni inzong Orchard Towers dailenbuk sungah luletaw kemzolo in zukhamcip in om cilawmlawm hi.
Tan Tock Seng Hospital ahzong Police Officer khat kammal ginalo tawh kobawlgawp cihi.
May 01 ni inzong Clarke Quay geinai aom Tan Tye Place aom Taxi Stand ah zukhamzel ahih manin numei khat nawngkaisak cihi.
Singapore gamsung ah azinpaksung in zu khamden in gitloh gamtatna tamveipi nei ahih manin, akigawm in mawhna nam 11 tawh thu kibawl cih kiza hi.
Related: Singapore gamsung MRT meileng Station gei ah Taxi khat meikang in puakkham
Tulaitak $20,000 Bail tawh kikhahkhia a, ahi zongin Friday ni ciangin thukhenzum ah thusitna thuakkik dinghi. ZD Sawltak #zomidaily
Comment piaknop aomleh...