Malaysia, Taiping khuasung ah Operasi lutin gamdangmi 45 kiman

Malaysia, Taiping khuasung ah Operasi lutin gamdangmi 45 kiman

Malaysia, Perak State sung aom Taiping khuasung ah Immigration Department te’n Operasi bawl uh a, gamdangmi naseptheih nading bangmah atawilo “undocumented foreigners” akigawm in mi 45 mankhia uh cih Bernama pan kiza hi.

Immigration director-general Datuk Seri Mustafar Ali in agenkhiatna ah zanni nitaklam 10:30pm hunpan in Operasi akipan hi a, tuzingsang 2:30am hunpawl in mansiangpan cihi.

Tua Operasi abawlhun sungin gamdangmi Foreigners akigawm in mi 159 thusitna nei uh a, tualak ah Malaysia gamsung naseptheih nadingin phalna bangmah aneilo mi 45 amansuak uh ahihi.

Akiman gamdangmi tepen Myanmar, Indonesia, Bangladesh gammi kici a, pasal 39 leh numei 6 aki mansuak ahihi.

Taman Aor Jaya leh Jalan Taman Lake View sungteng ah Construction Sites nasem in aom gamdangmi teng abanban in asitgawp uh ahihi.

Akiman gamdangmi 45 tepen Immigration Office ah thusitna aki neihkhit ciangin, Langkap aom Immigration Department te mikepna Detention Depot ah kipuak cihi.

Hih akiman gamdangmi te lakah Rohingya naupangno, pasal khakhatbek aphapan khatzong kihel cihi. Malaysia kumpi in tulaitak Myanmar, Rakhine State sung buaina hangin Bangladesh gamsung ah ataikhia Rohingya tepen hehpih mahmah uh a, huhna sum tampi apiakban ah Bangladesh gamsung ah ahuhding ngiatinzong mitampi kuankhia uhhi.

Cimawh dongtuak in aom Rohingya te Malaysia gamsung ah lutkhuanzong piakding kigeel ci uhhi. Ahi zongin agamsung ah aomsa Rohingya tebel manman veve uh a, deihbawl luatuanlo uhhi. Kumpi thunei lampan in aki thukhualsak mahmah uhhang in, agammi te’n sum tampi bei in Rohingya te akihuhdet pen zadah mahmah uhhi.

Malaysia gamsung ahzong cimawh dongtuak gammi tampi omkawmkal ah, hih Rohingya te ahuhdet ci’n aphunphun tammahmah hi. Politics, politics, politics…..

Perak State sungmah ahi Ipoh, Parit Buntar leh Semanggol sungteng ahzong abeisa Saturday zanlam 11:30pm panin Sunday zingsang 3:10am dong Operasi lutin gamdangmi 32 mah ki mankhia cih theStar te’n genkhia hi.

Related: Malaysia, Nilai ah Operasi nasiatak kibawl in gamdangmi 350 kimankhia

Perak State Deputy Immigration Director (Control) Ahamad Puat Abd Hamid in agenkhiatna ah Entertainment Center, Construction Workers Quarters, Residential Houses cihte ah akigawm in mun 87 ah Operasi kilut cihi. Hih Operasi pan akiman tepen Bangladesh, Indonesia, Vietnam, Thai cihbang gamtuamtuam pan hi a, Myanmar kihelkhalo hi. Sawltak #zomidaily