Ngongtat kullo in ih deihna bangci muibun sakding

Ngongtat kullo in ih deihna bangci muibun sakding ~ Nantal’suan

Awdam-pauna leh Ngot-pauna kiteh theilo hi. A nih tuak in muibun thei teei napi’n awdam in zahtaakkaai in saupi kimaang zaw aa, ngot-pauna in mailam susia thei hi. Mi pawlkhat te’ aa ding’ pianpih tawh a kibat hang’ pawlkhat te’n sintheih siamna zong a hi veve hi.

Ngotpau leh ngongtat kullo in, thudam tawh bangci muibun-zo ding’ cih pawlkhat ki kum dih ni.

1. Zahtaakna lakding

Ngot-pauna leh awdam-pauna a kilam danna pi-in, midang tung bangciang zahtaakna lak-zo cih thu a hi hi. Awdam-in a pau mi te’n mi-thugen ngai in, a thukimpihloh uh hang’ zahtaak bawl veve uh hi. Ngotpau-Awtol a zang a tamzaw te’n a hih leh, a langte’ zawhthawh bawl-in, thusim bawl meello uh hi. Mi -thugen te’ na thukimpih-pah kei zong in, a lungsim ding uh telsiam in zahtaak bawl veve in.

2. Mi-thugen ngai ding

Mi-thugen ngai-tumlo in tuhdaidai cih pen kihihsakna-lahna khat a hihi. Tuabang ciang in, ‘Na gente uh thupi ngap kei’ a ci ki hi gige hi. Mi-thugen mansakphot inla, ngai tinten in. A za bek hi kei in. Mi-thugen ngailo in, nang gennop bek na ngaihsutsut leh a gen uh thu’ na za kei ding hi.

3. Daitak in, om hithiat ding

Lungtomna in ngongtatna tawh kizom hi. Thu buai vengvung sung ah Ih omkhak vat teh, Ih pumpi zekdan khat in om aa, a ki phutgiap kei leh kitaisan vat thei hi. Tuabang hun na tuah ciang, saupi in na hu diik inla, sangkhia in. Sintulung in thuvatsat kei inla, hunla phot in. Bangbang a hizong, na aw sang sak leh awng buabua cihbang in om kha kei-in. Tua hi kei leh, ngongtatna in zuithei aa, hong kitaaisan mang ding hi.

4. Ngaihsun ding

Mi tawh na kikholh ciang, hunla in bang hun, bang mun ah bang gending genlo ding’ cih ngaihsun in. Ka thugen ka kampau-na, ka nasawlna tungtawn in, ka langkhat te’n bangci vei leh bangdan in la-ding uh hiam? cih ngaihsun phamahmah in. Ih ngaihsut lohciang, thaltang bang hileh a taltang ngim kimlai nang khe hong kha thei ek ding hi. Mi khual in. Mi na khual leh nang zong a kikhual’ na hi pah hi.

5. Theisak ding

Mi tawh na kiho ciang, nang gennop nagen ma in “Na gennop tel ingh” cih bang kammalno khat bek tawh a hizong, mi thusun te’ na zakna leh na tel-lam theisak in. A thupaizia dung zui in, a gente uh natelna thu, gen leh theisak hamtang in.

6. Thu dotbawl in, nusia ziau kei in.

Mi-gen khat, na thukim kei leh zong dotna tampi dong phot in, “thukim kei-ingh, hi thei kenteh, piang thei kenteh”, na cih bekbak sang in, ‘Tua dan hizaw lo ding maw? cihbang thudam lam zang in. Tuabang kammal neem nazatna hang in, na ngaihsutna hong ki theihpih zaw in, a khialh uh leh zong maizum kisuanna tawmzaw ding a hihi.

7. Nagennop thu kiteltak in sungkhia in.

Na thugen ciang, nehno leh awling dolhdolh selo in, kician tak leh kitel tak in, gen hiat-hiat in. Kammal thak, ciammuih peuh kihelsak se ke’n. A hitheizah in thu leh la, thupiangbang tawh na genthu-te belhbeh in. Na ngaihsutna te’ thupiang khat bang in, na genkhak lohding thupi hi. Na ngaisutna na genciang ‘Ka ngaihsutna hi’ ci pah in. “Ka ngaihsutna maan lel in teh” na cih khak leh a kitheisak, a ki hisak nasuak ding aa, na thugente’ muibun lo thei ding hi.

A hong kikhen sakthei kammalte sang’ pawlbawlna, gawmtuahna, kammalte’ zat sawm in. “Kei aa ding” ci lo in, “Ei aa ding” cihbang kammal te zang in. ‘Nang tua ci’, cihbangdan kawkna, mawksakna , thuhilhna kammal te peel in. Tuabang kammalte hang in, hong ki langpan in na kiim leh paam zong tawknawi thei hi. Pawlbawl le-cin ,nagennopna-thu sannuam kisa-in, a tangtung zaw ding hi.

8. Na maipuak, na heekzia kidawm in

Maipuak leh khutvei khevei-na tungtawn in zong, Ih thugen te muibun thei a hihi. Mukpet viavua cih bangdan te’n, gitloh lim puamahmah a hihi. Na ki hopih te’ mit etding a hoih sam hang’, sauvei-lua leh zawhthawh bawlna suak thei hi. Paukawm in a maulam ah onkawm lai le-cin’ a maumun teng laksak tawh kibang in a omdan-uh cimawh in, nuamsa-lo semsem thei uh hi.

Thumaan gending leh lungsim kihon ding a thupit mahbang in, khut leh khe koihdan zong a kihon kul hi. Gentehna in, mikang te bang in, khutzep cihbang diksa hetlo uh hi. Kawlte’ aa tawh kilehbulh lian!

9. Midang te kiang pa’n thudotna ngen in, sam in

Na thugen khitciang ‘No bangci ngaihsut?’ cih bangdan in, thu hong ki dotkik ding nasap nahanthawt ciang in ‘No cih zong thudon ingh’ cihna zong a hipah hi. “Hong thukimpih lo kua?” cihbang lela sang hoihzaw tham hi.

10. Nget bawl inla, sawlbawl kei-in

Na sawlnop khat a om ciang in, ngetbawl zaw inla, sawlpah buatbuat kei in. Gentehna in, “ Hih nithum ni na zo in” cih sang in “ Nithumni-in a kingah thei ding hiam?” cile-cin a deihna tung veve hi aa, a masa kammal in, mi thalawpsak zaw in buaina tawmtuam hi.

Thukhupna

Thudam-awdam tawh muibun ding Ih cih ciang in, midang-te’ hihna , sukha lo, simmawh bawllo, lungtang na saklo in, zahtaakna tawh Ih thu gennop, Ih sawlnop khat kiciantak, thumaan tak tawh ahoih lam in, kampau leh luheek zattheihna a hihi. Hih bang siamna na zatna hang in, nang hihna zong, hong ki sukha lo in, kizopna zong sauvei kimaang ding bek thamlo, thuhoih mihoih in zong a hong kiciamteh ding hi.

A tung aa thute na zuihzawhna leh na zatzawhna hang in, mi-te’ tawh sepkhop, bawlkhopna ah, hong gui-awk sak thei te’ tampi mah na peelzo ta ding hi. Nantal’suan (Top Tips for Being Assertive not Aggressive pan kilet khia a hihi. Source: Anonymous)