Seppihte Tawh Kilemna Ding ~ Hau Za Cin

Seppihte Tawh Kilemna Ding ~ Hau Za Cin

Nasepna mun ah kilem tawntung cih omtheilo hi. Zomi Paunak ah, “Lei leh Ha zong kipet kha” acih mah bangun seppihte tawh kinial hun, kitot hun, ngaihsutna kibatloh hun om tham hi. Tua bang hun ciang bangci’n kilemkik ding, bangci’n kikhawl kik ding, semkhawm kik thei ding cih thupi mahmah hi. Munkhat ah semkhawm kimlai kikhen biakbuak cih bang hithei khin samlo ahih manin a damsak kik dan, a bawlphat kik dan theih ding, siam ding kisam mahmah hi.

Mihing pen a genhak mahmah nam ahi hi. Lungsim kikhel baih mahmah a, upna nangawn kilaih thei zen hi. Kisap leh deih bel lui tui luang mahmah bangin muhtheih in kikhel dandan hi. Tua bang hun ciangin mihing ngeina leh mihing lungsim tawh a kituak khat pen midang khat adingin na kituak khin khollo thei hi. Tua banga ngaihsutna akibatloh ciangin a kibat theihna ding zon hiam, a kibatlohna te gencian hiam, kitelsiam sak tuah hiam kisam hi.

Mi pawlkhat pen (khuamulo diak in) ama cihloh cinuam vetlo, ama ngaihsutna khek nuam vetlo, khial hi cih kithei taleh pang tentan om hi. Tua bang mite pen mikangpau in stubborn kici hi. Genhak, hilhhak, theisiamhak, ahih kei leh a tuamdeuha a uanggen nuamte adingin ‘hai’ ‘theilo ahihlam kitheilo in thei kisa kha’ ‘pillo’ ‘mawl’ cihnopna a hi.

Deihdan kibanglo, ngaihsutna kibanglo cih pen mihing ngeina ah a om den ahi hi. Nupa nangawn deihdan kibanglo thei a, innkuan khat nangawn deihdan duhdan kibanglo thei hi. Mihing khat nangawn a deihzawk theilo in amah leh amah kinial thei hi. Ahi zongin a ngaihsun thei leh a pilvang mite in tuate bawlpha pahpah, lemsak pahpah uh hi.

Ngaihsutna kibanglo pen a sia hilo in tua bang om thei hi cih telsiam loh thapai pen a hoihlo ahi hi. Ka ngaihsut bangin ngaihsunlo uh, ka cih bangin hong manglo uh, kei deihdan hong thukimpihlo uh… cih den nopna lungsim pen a hoihlo ahi hi.

Ngaihsutna a kibatloh ciang, deihna a kibatloh ciang, duhdan a kidang ciang, sepnop dan akibatloh ciang a nuai a thu nga te phawk kik zel ni.

1. A Hoihzaw lakkhia in. Ngaihsutna a kibatloh ciang a hoihzaw ngaihsutna lak khia thei lecin mite in nang ngaihsutna pen ‘a hoihzaw himah ei’ hong cithei ding uh hi. Na lah theih tuan kei nang ngaihsutna zong a hoihzaw hituanlo hi cihna ahi hi. Sepzia ah zong tua mah hi. A hoihzaw, a kicingzaw, amanlangzaw a sepdan lakkhia lecin nang sepzia a muh uh ciang hong muangpah ding uh, hong umpah ding uh hi.

Ahi zongin kidop a kulna khat om hi. A hoihzaw lak thei kei lecin mite hong muhna dau thei hi. A ci khongkhong hi, a kampi bek hi, ama thu bek a deih hi ciin hong muanna khempeuh uh bei thei hi. Tua ahih manin na hih ding ciangin, na sep ding ciangin na kidop a kul na khat om hi. Kikupkup manloh sepkhiat pah a kulte ah semsuak pah lel in, a sia ding maw, a pha ding tawikhai in a hoihpen hi in na theih tawh sem mai in.

A hoihzaw in kisem theilo ding hi cih ngaihsutna a nei dente ‘hithei mah hi’ cih na lah nopna tawh semsuak in. A kisem ngeilo, akihih ngeilo ahih hang hih ding sep dinga hoih mahmahte na hih ding ciangin mite thukimpih khit hun dong ngak kei in, sem suak lel in. Nang ngaihsutna ahih man leh nang minphatna ding ahih man bek hilo in midangte ngaihsutna khempeuh tawh na tawikhai khit ciang nang muhdan, ngaihsutdan mah hoihpen hi cih na tel ciang hong kithukimpih kei zongin semsuak lel in, a tawpna ah a hoihzawkna hong mu veve ding uh hi. Kiphatsakna leh kei ngaihsut hi cih lungsim peuhmah omsak kei in.

2. Semkhawm in. Ngaihsutna a kibat hetloh ciangin, no ngaihsut ciat uh hoih pen in na ngaihsut ciat uh ciangin no ngaihsut ciat tawh kalsuan nailo in ngakbawl, khawlbawl phot in, na sepna lui uh, sepdan sa mah tawh semkhawm phot un. Midang lungsim nat tawntungna ding ahih leh tua pen sep nailoh hoihzaw hi. Thukim theihna tengah sepkhawm phot ding hoihzaw hi. Banghang hiam cih leh nang muhna hoihzaw maw, na lawmte muhna hoihzaw maw cih kitel nailo hi. Na ngaihsut bang vua na kalsuan uh leh na sepna uh, na sepsakte uh, na mipihte, na kipawlna nangawn in thuak thei ding, hoihlo zaw thei ding ahih leh a siat sangin a hoihlo ding kidalkholh thupizaw hi.

Supna tampi a piangsak thei ahih manin ngakngak leng zong hoihzaw ngaihsutna hong piang ding hituanlo hi. Tua manin tua bang dinmun ah din khak pen supna tam mahmah hi. Semkhawm ding, kikum khawm ding, genkhawm ding cih mah thupi kik hi. Mi a tamzaw in a thukim theih dong mah kikup ding, gen khopkhop ding ahoih pen hi. Tua manin ngaihsutna a hoih mahmah tuak nih a koizaw pom ding cih khentel a haksat ciang mi tamzaw in hoih a sak genkhop hamtang ding ahi hi.

A hoihzaw ding hong piang theilai ahih leh zong semkhawm lai phot dingin ngak bawl zaw ding hi. Thei dinga i up kholloh mi nautang lak pan ngaihsutna dong leng zong upmawh lohpi thuhoih mahmah hong piang liamliam thei hi. Mimal nuntakna leh kizopna a siasak thei ding thu leh nasepzia te ahih leh kidop a, sep ngei banga seplai phot ding, manlah lo a kikup kik dinga koih ding ahoihpen ahi.

3. Kimaisak ding. Hihkhialh, sepkhialh a om ciang ‘khial ing ei’ ciin kigen dingin a khiallozaw in zong maisak ding hi. Mawh kipulak, khial in ci napi pawlkhat in tua bang mite maisak nuamlo, a kipulakna uh saan sak nuamlo cih bang om thei hi. Tua bang mun ah mite a maisak thei hih pen picinna nam khat hi. Khial gige napi khial in cih noplohna pen kiphatsakna ahih manin mihai pen in zong paktalo hi. Kua mah a khiallo omlo, a khial theilo zong omlo ahih manin maisakna nget ding pen zumhuai, neuvai, niamvai in ngaihsut hetloh ding ahi hi. Mi picing leh khuamuzaw te in lungsim takpi tawh ahih theih uh nam ahi hi.

Tua banga mawhna kigen a, mawhna kimaisak ciangin nasepna mun ah kilemna om in, kitheihsiamna hong om a, amah zong a khialh ciang mite in maisak uh hi. Tua ahih manin a tawp dong kilem ding, sepkhop ding akulna munte ah kimaisak ding a thupi pen hi. Mawhmaina kingen kei leng a semkhawm thei nawnlo ding, kipawlkhawm a haksa ta ding dinmun ahih leh kimaisak ding, mawhna kipulak ding mah a thupi hi. Kilemna ding deih man hilo lauh man, dawilok mana maisakna kingen cih bang ahih leh bel kilemna piang tuanlo hi.

4. Kipelh ding. Seppihte tawh kilemna dingin ngaihsutna a kibat kei leh kimuhmuh loh mai ding cih pen ngaihsutna nam khat hi. Kimuh a kul ahih kei leh kimuh loh ding hilel hi. Kimu leh a gen ding omlo, a ngaihsutna uh a kibang kik ding cih zong ahilo ahih manin kimuh a kulna omlo hi. Room tuam tek ah sem, khua tuamtek ah sem, mun tuam tuak ah sem hilel ahih manin a kisaptuahna uh omlo hi.

Ahi zongin koikoi ah mihing pen kipawla kalsuan khop kan-a khantohna kicing omlo hi. Tua manin kikholh, kipawl, sepkhop mah a thupi pen hi. Tua bang ahih theih kei leh bel eima sepdan tuam ciat tawh sep ding hiphot hi. Upna kibanglo biakna khat ah om ding cih bang ahih theihloh mah bangin ngaihsutna kibanglo munkhat ah sepkhop ding cih zong ahitheilo hi (lah khiam nuamlo tuak uh ahih leh).

Ngaihsutna a kibatkik theih mateng a tuam tuak ah a sep mah uh hoih hi. Kipawlna tuam tuak pan a sep uh hoih lel hi. Kilemna om a, ngaihsut hong kibat mateng tua banga kalsuan phot sialo hi. Koih khawm leng ui leh kel mah bang ding uh, kipet ding, kingit ding uh ahih manin. Tua banga tuam om, sepkhop loh pen supna pawlkhat om mah leh siatna zah in siahuailo zaw hi.

Tua ahih manin sep ding hoih, ahih hang sepkhop theihloh ahih ciang tuam sep phot zaw ding, omkhawmlo lel ding, kimu sese lo lel ding. Mi tamzaw deihna ah sepkhop ding a hoihzawk mateng tuacih lai ding. Semkhawm, gawmkhawm leng zong a lungkimlo hon khat mah a om sese sang a tuam in a om phot mah hoihzaw sak mai ding.

5. Huaisiam ding. Mihing lungsim pawlkhat pen amau angsung bek a thei om hi. Tua bang mite bak mah bangin khuazing sung bek ah kileh kawikawi hi. Mipi muhna ah kilaak ngamlo napi mipi muhlohna munte ah kicinglah mahmah thei uh hi. Maipha ngahna ding mun bang thei vial uh hi. Sepna phual ah a madawk hih ut, a kipahtawipen hih ut, makai sem ut, mite phat leh pahtak pen hileh ut. Tua bang mite in itna leh deihsakna taktak neilo in amau ankuang ding leh ama maipha ding bek a zong ahi hi.

Sepkhiat gina nei mello napi kicinglah mahmah kawikawi vanglak hi. Nawlkhin leng supna lianpi ahih pahloh hangin a paina phual ah mite in na pakta siam peuh leh mite theih leh vai khat peuh kizelsak thei kawikawi leuleu hi. A hoihna leh a hoihlohna tampi om hi. Ama kicinlah zah in lah phattuamna piangsak khollo, nawlkhin leng lah supna neu no khat hiveve si. Tua bang mite pen huaisiam ding kisam hi. Huaisiam kei leng nuak in pusuak a, mun dangah kisuan hi.

Tua ahih manin tua bang mite leh tua bang ngaihsutna tawh a kalsuan mite pen “nek dinga lah su, paih dinga lah sa” upate in a cihte uh ahi hi. Ahi zongin amau mun leh sep ding zah telsiam taka huaisiamna in kipawlna, sepkhawmna thahatsak tuam hi. A hanciam a kuhkalte zah ahih loh hang pum pampaih dinga lah a pammaihte hi uh hi. Na thanem ni, na bah ni in tha hong pia, hong vaan, hong phawk mite peuh hithei bilbel leuleu hi. Tua manin mun pia lualo ding, lah pampaih samlo ding, a huaisiam dan ciang khat nei ding. Huai lua lecin na sepna phual, na seppihte mai ah maipha suplawh theih hilai hi.

Mikim tawh kikhawl theite in tua bang mite zong huaisiam uh a, kideih hi, kiit hi, kipampaihlo, mi kim kisang hi cih lahna hi. Mi tawh kikhawl thei, midang huaisiam cih pen mi picingte picinna lahna khat hi a, mikim hihtheih hilo leuleu hi. Supna lianpi leh siatna lianpi tunlo uh ahih manin a genhak mahmah, a sep ciang zong a sep liau mahmahte sang a deihzawk hun om a, muanhuaizaw thei uh, hong nusia ziauziaulo uh hi. Kilemna, kipawltheihna, sepkhop theihna a kisap mahmah na mun ah mi hoih mipha bek hilo, a deihhuai mello, a it huai mello leh a utna banga a leng kawikawite nangawn huaisiam pen a thupi mahmah, mi kician hihna namkhat ahi hi. Hau Za Cin