Tukhang khangnote’ khan ~ Dr. Pau Khan En

Tukhang khangnote’ khan (The Youth of this Generation) ~ Dr. Pau Khan En

Leitung khang tangthute en le hang ngaihsutna thuthakte kum za om simin a na kikhel tohtohna teltakin i mu thei hi. Ahi zongin kum zalom sawmnih (twentieth century) bei kuan ciangin kum zalom khat ngakzo lo-in kum sawm lom (one decade) sung cih phial dingin thungaihsutna hong kinak khel pha mahmah hi. Kum (1980-2000) sungin Hunkhen thu pomzia (post–modernity) le Leitungbup huam ngaihsutna (Globalization) te-in leitung buppi hong zeel ziahziah ta hi.

Hun khen thu pomzia hangin tangtawng ngaihsutna ahi thuman khat bek om (absolute truth) pan in thuman i sak bangbang aman hi lel hi (relative truth) cih thu hong lang mahmah pah hi. Thuman le maan lo pen i et na tungah kinga zaw lo (objective truth) in tua na a en nu a en pa tungah kinga zaw hi, (subjective truth) cih ahi hi.

Tua bang mahin leitung zong a nei tuam om sese lo-in zang khawm ni, zangkhawm zeekkhawm ni cih hi-a, gam khempeuh ah sum zuak zum bawlna company te (multi-national company, transnational company) hong om to pah zuahzuah hi. Hih globalization kici taang leitung ngaihsutna ah a kilang pen zia le tong (characteristic) in kidemna (competition) ahi hi. A zote khang toto ding a, a lelte kia suksuk ding hi, cih hi mai hi.

Hi banga khanghun a kikhek laitakin khangthak hun a nei, pilna siamna a sin Kalay University a om, Zomi Siamsin Kipawlnate in Laisin kum 2017-2018 kum ading “Siamsin Magazine Volume 5” na sunga suahsak dingin thului (article) hong nget uh ciangin ka lungdam a thului khat kong gelh pah buatbuat hi. Ahangin amaute khangthak hun ah i muan i suan ding, i gam i lei le i minamte hong makaih dingte-uh ahi hi.

Nawl khin theih loh ding tukhang leh mailam khangthak hun adingin i mi poimawhte- uh ahi hi. Kam dang khat in ci le hang tu khang leh mailam a ding a, a kithawi khol a kiging khol pilna siamna nei khangnote uh ahi hi. Tua ahih manin “TUKHANG KHANGNOTE’ KHAN” cih thulu bulhin ka ngaihsutna pawl khat hong pholh khia in Siamsin tuailaite zong ka vaikhak nuam hi.

1) Tulai Siamsin Khangnote in pilna mahmah hong bulphuh veva ding uh ka deihsak masa hi. Sangman ding leh degree ngah maimai ding ciang bek hi lo-in amau sin pilna siamna (major field) tektek theihpi a hong theih, siam pi a hong siam ding uh ka lunggulh mahmah hi. Pilna peuhpeuh a val om het lo hi. University a siamsin Khangnote aw, na sin uh thu (major subject) khempeuh siam mahmah dingin hong hanciam un. A zo, aman leh a tunga ka gen mah bangin degree ngah maimai ciang bek hi lo-a, a siamngiat ding leh i gam i lei, i minam sungah a zang khia thei ngiat dingin hong hanciam un cih kong vaikhak nuam hi.

2) Tukhang a Khangnote’ Khan ding aka deih, ka lunggulh leh Siamsin University a tuamtuam a om tuailai Khangnote ka vai khak nop thu in pasian mahmah mangngilh loh ding ahi hi. Pasian masak lo-in kikhawsuak zo lo hi. Gam leh lei, i minam kipuah zo lo hi. A tomin ci le hang midangte ading kinung ta zo lo hi. Tua bang ka cih ciangin Pasian thu bek ngaihsunin sang man ciangin hunbit Pasian nasem ding a cipah ka hi kei hi.

Tua pen Pasian’ hong teel thu hi ding hi. Ahi zongin Pasian phawk kawm zahtak kawm a na sep khempeuh Pasian nasepna mah hi pah hi. Tu laitak in i minam sungah i kisap lian pen in hunbit Pasian nasem ding sangin Pasian bulphuh leitung nasem tampi i kisam zaw pek hi. Bang hang hiam cih leh tua pen taangzai zaw thuk bun zaw hi. Ka khualzinna a ka giahna hotel khatah laikhat na kisuanga tua lai in,

• “Lawh nei dingin sin in (Learn to earn)
• Nuntak nadingin lawh nei in (Earn to live)
• Taangpite’ na sem dingin nungta in (Live to serve)”

ci-in lai na kisuang hi. Ka lungsim hong khoih hi. Hi kasa peuh mah hi. Pilsinna i kungmui in taangpite’ adinga nuntakna hi thong hi. Pilna na sin laitakin nanu napa, nakhua natui in nang hong lamen hi. Na Pawlpi in nang hong lamen hi. Kawlgam bupin nang hong lamen hi. Tua tetungah na hoih sem ding (to serve) in nang hong kilemen mahmah hi. Pasian bulphuh in nikhat ni ciangin minam makai leh gam makai na hih ding lamen in nang hong kilemen hi. Tukhang, Khangnote’ Khan in Pasian bulphuh khangnote hih ding mahmah thupi pen hi.

3) Tukhang Khangnote’ Khan ding a, a lungulh huai mahmah khat in muhkholhna (vision) neih ding ahi hi. Mailam kum sawm, kum sawm nih, ah Zomite koi ci kalsuan ding cih muhkholhna neih ding kisam hi. Muhkholhna (vision) nei om kei leh minamte kiam duaiduai ding hi. Ahi zongin tua Muhkholhna pen mimal khat bek muh kholhna hi lo-in mikim muhkholhna (common vision) ahih ding kisam ding hi.

Tua bang mah in tua Mulkholhna zong sepna in a zuih ding kisam lai ding hi. I minam leh i gam i lei adingin Muhkholhna nei makai leh tua muhkholhnate a sem ding makai tampi i kisam hi. I minam pihte-in Siamsin Khangnote tung panin tua bang a Muhkholhna leh mangmatna (vision) a nei, tua Muhkholhnate a semkhia makai nong hih ding uh hong lamen hi.

I minam leh i gam i lei adingin Muhkholhna (vision) nei-in tua Muhkholhna (vision) pen sepkhiatna (action) in a zuih ding kisam ding hi. Hi kei leh i Muhkholhna (vision) pen zalmang (dream) bek hong suak ding hi. Tua ahih manin Tukhang Khangnote’ Khan ding a ka lunggulh in Muhkholhna (vision) mahmah hong neih ding uh ahi hi. Tua phot lo-in i minam le i gam i lei kipuah kizuun zo lo ding hi.

4) Tukhang Khangnote’ Khan dinga ka deihsak lian mah khat in Gamsung ki-ukna (politics) ah kihel ding ahi hi. Kum 50 taang (1962-2010) bang khakcipna (restriction) i thuak hi. Tu-in i deih zah le i lamet zah ahih nai loh hangin tua henkol damdam in hong kisut ding tawh kibang hi. Hih hun laitakin pilna nei tuailai khangno tampi gam ki-ukna Nainganzi (politics) ah kihel ding kisam hi. I kihel kei leh mite’ nuai ah i om den ding hi. Tho to-in ei zong i deih na i awsuah ding (voice) kisam hi. Pasian nasem ding tua zah in i kisam pak nawn kei ding hi.

Ahi zongin gam ki-ukna (Nainganzi) lam leh kumpi nasem lamah (civil service) tampi i kisam lai hi. Tua ahih manin Tukhang a Khangnote aw, i minam leh i gam i lei puah ding in ki-ukna (Nainganzi) a zui khangno tampi hong kipia khia un. Hong panpih dingin i minam bup in kong ngak uh hi. Hi pen biakna nasep zah mahin a siangtho, a manpha, a haksa nasep ahi hi. Kipiak khiat (sacrifice) kul hi. Baih lo, ol lo hi. Ahi zongin i minam le igam i lei na it uh leh sep loh in pha mawh hi. Ei in i sep kei leh mi-in hong sem ding a mite’ khut nuai ah i omom ding hi.

Kei lunggulh ngel ah bel mai 2020 kitel hun ciang peuhmah in Zomi Siamsin Khangno sungpan in nih leh thum hong kidok khia in mekuang hong lui a, tua te mah Zomibup in me pia pah ngiat a Zomi tang mi hong hih dinguh ka lunggulh le ka thungetna ahi hi. Nainganzi peuhmah nawlkhin khakha lo-in thutak in sunglut in makai hihding tum dih ni. Siamsin khangnote aw, hong hanciam un.

Tua zah khat mahin kumpi nasepna (civil service) ah zong pilna nei Tukhang Khangnote tampi lut dih ni. Khat le nih i om kiaukiau hi. Lungdam hi hang. Maingal tuam hi hang. Gam le minam ading a nuntak theihna, nasep theihna leh gamtat hoih gamtat pha teci pan khiat theihna tua mun ahi hi. Khangno tampi kumpi nasepna sungah hong tualbual le-uh cin cih i minam bup taangin kong hanthawn hi.

Tukhang Khangnote’ Khan dinga ka lunggulh thu a ngana in khangnote lungsim taangzai a, a huam kim ding (inclusivism) cih ahi hi. Ei Zomi sungah zong ki batlohna tampi i nei hi. Kampau awsuah, i kibang kei hi. Teenna mun le mual kibang lo-in a kual a kual in i om hi. Biakna pawl (denomination) in hong khen lai hi. Hih bang nianua lak a, a om Zomite khatlekhat kigimneih lo-in i kihuaikim nading pen Tukhang a Khangnote’ Khan ding ahi hi. Kipuaseh ding baih a, kihuaikim ding haksa hi.

Hita leh Tukhang a Khangno Siamsin mipil misiamte-in a minam a hiang a meng khempeuh puaseh het lo-a, sungtumin huaikim ding kisam hi. I kibat loh i kilamdannate kitelsiam kisang siam a thupi lapi a om ciangin lawng khat a ging zo ziahziah dingin i om ding kisam hi. Hih in Tukhang Khangnote’ vaipuak hingiat hi. Ei Zomi nam bek hi lo, sak le khang a omte leitungbup a om khangnote tawh suakta tak in kizom kipawl thei in mite thusim le zahtak banga a om theih ding pen tukhang Zomi Khangnote vaipuak lian pen ahi hi.

Tung Pasian in Kalay University a om Zomi Siamsin kipawlna thupha pia hen la, akhang akhangin kip semsem zai semsem ta hen! A minam bup uh Kawlgam bup adingin zattheih pilna siamna a nei minamte suan minamte muan leh “Tukhang Khangnote’ Khan’ a hoih a, a zeem le a zuun zo dingin i biak Pasian in hong siam ta hen! ci-in thupha kong paih hi. Rev. Dr. Simon Pau Khan En (Ph. D, D.D)