Mualsangdawn ah Selfie Photo kizaih nupakop kiasuk in sihlawh

Mualsangdawn ah Selfie Photo kizaih nupakop kiasuk in sihlawh

USA gamsung aom California’s Yosemite National Park ah nupa kopkhat mualsangdawn, kildawn khatpanin kiasuk in si uhhi. Tua nupakop te ii akiatna athu akikan ciangin tua nupakop tepen mualsangdawn, kildawn ah amauleh amau Selfie Photo kizaih in akia uh cih AFP pan kiza hi.

Tuabang in akiasuk nupakop tepen India gammi kici a, kum 29 aphakhin Vishnu Viswanath leh kum 30 aphakhin Meenakshi Moorthy te ahi uhhi.

Ameltheih tanau te ii genkhiatna leh Media te Report pulakna ah tua nupa tepen Railing aki umna aomlohna Taft Point panin akiasuk cihi. Aluanghawm te uhpen Thursday ni in Park Rangers te’n tawmkhiathei uh cihi.

Viswanath ii asanggampa in Local Media te tungah agenkhiatna ah asanggamte nupa pen anih un Selfie Photo akizaih laitak in akiasuk hiding hi ci’n genkhia hi.

Tua atuahsia nupa tepen United States gamsung ah ateng uh hi a, khualzin a ukmahmah Travel Enthusiasts ahi uhhi. Holidays and HappilyEverAfters cih Blog khatzong nei uh a, akhualzinna Photo leh athute tua Blog ah Update bawlzelzel uhhi.

Nungdiak mahmah inzong Instagram tungah Photo khat khahkhia uh a, Moorthy pen Grand Canyon akiu asangmahmah tungah atutlaitak Photo akizaihkhat khahkhia hi. Amau nupa pen tuabangdan in alauhuai, acikziat huai “Dangerous locations” munte ah Photo kizaih a ukmahmah te kici hi.

Tuabangin alauhuai mahmah munte ah akizaih Photo akhahkhiatna ah amahmah in “ih nuntakna pen Photo khattawh khekdingin akituak hiam” ci’n Caption gelhsawnsawn hi. Tuabang agelhzawh asawtlo in California’s Yosemite National Park ah Photo akizaih laitak in anupa un akiasuk hi a, Photo pongkhat kizaihna hangin asihlawh takpi uh ahihi.

Tua nupa te akiatsukna pen mualsang, kensang mahmah 245 meters (Pi 803) bang asanna panin akiasuk uh ahihi. Aluanghawm zong aki toptheih nading hamsa mahmah a, Rescuers te’n Helicopter zangliang in aluanghawm azonkhiat uh ahihi.

Nungkhasung in “Journal of Family Medicine and Primary Care” kici kipawlna te’n Studay kankhiatna abawlna ah abeisa kumsung in leitung gamtuamtuam ah Selfie Photo kizaihna hangin mi 259 bangin sihlawh uhhi ci’n pulakna neikhia uhhi.

More: Gamsung ah vompi (bear) tawh Selfie akizaihsawm pasalkhat vompi in phuailum

Tuabangin Selfie kizaihin asi lakah India gampan in asi tampen kici sawnsawn hi. 2011 kum khitzawh India gamsung panin Selfie kizaih in asi pen mi 159 bang phakhinta hi ci’n Study bawlte’n pulakkhia uhhi. Selfie kizaih ukdiak nungak tangval te bekthamlo, nupi papi te’nzong Selfie kizaihding ciangin kidop siamding thupi khading hi. Sawltak #zomidaily