ZIUSA pan KHUADO Thupha puakna

KHUADO Thupha puakna :: Dear kong it, Zomi pi leh pu, nu leh pa, u leh nau, lawm leh gual khempeuh aw,

Na vekpi un KHUADO thupha ci-in na khuttaklam tek uh konglen hi. leitung minam tuamtuamte sungah Zomite zong minam lian khat ihihna, ngeina hoih, ngeina kip anei minam picing ihihna ong lakkhia pen tutunga ibawlding i Khuado zong khat in kihel ahihi. i KHUADO pen bang huna kipana kibawl cih laitawh ciaptehna a omlianloh hangin Zomi thu a kan i mipilte in tum akum 600 laipekpana kibawlkhindingin upmawhna nei uhhi.

KHUADO cih akhiatna pen ahuampi-in a gending hileng i pu i pate in KHUA a cih uhciangin mittawh i muhtheihloh ei phattuam nadinga ongbawl, ongsiam i Pasiante leh ei ong bawlsiathei dawi gilo, kau gilote a gennopna uh na hihi. Do cihciangin ei hoih nadinga ongbawl i Pasiante zindona, lengla dona hun ahihkeileh ei ong susiathei dawi gilo, kau gilote nawhkhiatna, dokhiatna hun cihbangin i pu i pa te in Pilvaang takin KHUADO cih kammal nazang uhhi. Hih i Khuado pen a tom in Pasian tungah lungdamkohna leh Dawite hawlkhiat huna kizang ahihmanin tuhun i Christian ngeina tawh ki tukalh hetlo in ki belpawl, ki unau mahmah zaw ahihna kimu thei hi.

Zomite sungah hih ih KHUADO zah a, lung ki hualtaka ih neih, ibawlkhop adang omlo ding hi. Zomiten KHUADO ih neih tawh a kisunpian in I gamvengte ahi vaite in “Diwali Puja” a cih uh Khuai meivak pawi leh kawlte in “Mithuun Puai’ meivak pawite zong ei KHUADO tawh a hun leh a zia ki bang pian himah leh i bawlna ahang, i deihna kibang hetlo hi. tuhunciangin Zomi langpang pawlkhat in KHUADO cih min suphiatnuam in tuataang in khaithak nekpawi (Harvest Festival) cihbangin ong laihsaknuamzong om ahihmanin Zomite i pilvan mahmahding kisam hi. ataktakin hih i KHUADO pen Zomi hing a kicilo mi namdangte ong neihpih vetloh atuam vilvel a ineih ngeina khat ahihi. atuam khatin genleng hih i KHUADO pen Zomite adingin the Seal of Zomi People cihtheih zong ahihi.

Tua ahihmanin tuipi galkai Zomi khempeuh in hih i Zongeina Khuado pen i ngeinatawh a kituak pen ding leh i hihtheihna sangpen, a hoihtheipen, a kilawmthei pen, a nopci theipen a i bawlkimciat nadingin Zomi Innkuan USA kipawlna mintawh ong hanthawn leh KHUADO thupha kongpuak uhhi.
​

Itna tawh,
Pa Tual Sawm Lian

Executive Director
Zomi Innkuan USA, Inc.
October 09, 2017