ZIUSA Annual Conference 2019 leh Zomi Political Forum nuamtak kizo

Special News report: ZIUSA Annual Conference 2019 leh Zomi Political Forum nuamtak kizo

Zomi Innkuan USA (ZIUSA) kipawlna ii Annual Conference leh Zomi Political Forum pen USA te’ khuapi ahi Washington D.C ah July 5-6 sung Zomi Innkuan Washington D.C area (ZIDCA) te inntekna tawh nopci tak leh picing tak in kibawl thei aa, tualai ah US gam state tuam tuam pan Zomi Innkuan Palai (delegates) tampi leh Kawlgam leh India pan Ulian, mipil te hong kihel thei uh hi.

Zomi Political forum ah Speakers dingin Kawlgam pan MP Pi Cing Ngaih Mang (Member of Parliament, ZNC/ZCD) leh India gam pan Pu Golan Suanzanang Naulak (Integrated Mountain Initiative, National People’s Party) te hong kihel thei uh hi. Zomi Political forum ah Moderators nih, speaker 4 leh Panelists 5 te kihel uh hi.

Tualai ah 2020 Myanmar Election leh Zomite din mun, tulai tak Zomi te Political dinmun, Zomi International Conference 2019 (ZIC) vai ma ban cih te tampi thupi takin kikum thei uh aa, Zomi te taangthu sungah USA te’ khuapi Washington DC ah akhat veina “Zomi Political Forum” kibawl zo ta ahih manin angtan huai leh lungdam huai, kipah huai mahmah hi.

ZIUSA Annual Conference zong nopci tak leh picing takin kibawlzo aa, 2019-2020 aading ZIUSA Board of Directors panmun kitelna (Election) zong nuamtak kibawl thei hi. Tualai ah Board Chairman – Pu Go Sawm Khup, Board Vice-President – Pu Nang Khan Dong, Secretary – Pu Tual Khan Suan, Treasurer – Pu Mun Mang leh Board members 17 te picing takin kitel khia thei hi.

ZIDCA pan Pu Thomas On Sian Mung zong Board member in hong kihel thei hi. Tua bek thamlo in tukum Election Commission ah zong ZIDCA huam sung pan Pu Ngocingthawng Suantak (ZIDCA Advisor) leh Pu Suan Mang te zong hong kihel thei uh hi aa picing tak in kibawl zo hi.

Tukum ZIUSA Annual Conference hong pai palai khempeuh in nuam kisa tek aa, inntek ZIDCA te zong kiangtang mahmah in hong makaih ZIUSA te zong thupi leh picing kisa mahmah hi. Hih conference in Zomi makaite kipumkhatna, sepkhoptheihna te hong kilangkhia sak thei ahih manin Zomite aading angtan huai mahmah hi.

More: Zomi Forum ~ Ih Gam, Ih Lei, Ih Mailam

ZIUSA maban te hong lawh cing sem sem ta hen la, USA gam om Zomite hong makaih zo, hong vaan zo kipawlna ahih theih nading in i biak Pasian in hong lamlak ta hen. Zomi DCA News, Information Department, Zomi Innkuan Washington D.C Area