Zogam Politics khuahun

Zogam Politics khuahun

Politics gen hun taktak hong tun ciang thu taktak kigen thei nawnlo zawmawk. Kitel kuan ong hih taktak ciang bel pumgup policy tawh tel tumteng lopi, zakkhak ngei khatpeuh bulphuh a politics thu nennen gen nuam ong tam zawzen in, thu thupi leh vai lian taktak ki-gen thei nawn mahmah lo ding dinmun ong hipian zaw mawk.

Gam bup, Minam bup a huam ding thu i gennop, i vaihawm nop leh panmun kituh cihbang a omthei lo mapandan vaidang khat vaihawm ding dan himai inteh.

MP cihpen contractor agent peuh sa a, kumpi project budget phawhlawh lam-etna tawh tanau huaina ding nasep peuh a sa hiihiai lel khawng in ong kitulmawh a, candidate mun nangawn tanau vai peuh a ong kiseh lunglung zawzen ciang bel Zomite i khasiat huai lai dan kam a gen theih zong ahi nawnlo himai hang e….🤔😫

Khangthakte leh mipite pilvang ni. Tanau, beh le phung peuh tawh vai kihawmte tha i piak leh mun ong ngah uh ciang zong tua mah tawh ong buaikhop lel ding uh a, Mi’ khateh dawhte’ khateh dawh sawn i suak lel ding hi. Khutdawh ngente kiang a khutdawh ngensawn peuh i ut kei leh maw… i ngaihsut mahmah ding kisam ding hi.

A masa in, guptuam paihtuam neilo mit-ciim tak hak lela mah a i et kul ding a, i tel mahmah khit ciang teel ding, gup ding leh paih ding muthei pan ding hi hang. Mipi neutral masa phot a, thuging laging bildawh leh hak setsat ding, “cih pong khemna – propaganda” leh thu taktak i khentheih ding a lunggulh huai mahmah ahi hi.

Zomite bang level ut?

1) Hausa level ut maw? Khua khat ciang a makaih zo, Hausa level makai teel ni.

2) Myone level ut maw? Myone khat ciang a vaan zo Myone level makai teel ni.

3) State level ut maw? State khat ciang a uk zo level makai teel ni.

4) Gambup level ut maw? Gambup ah mite tawh a kinawt cetcet zo makai teel ni.

5) Leitung level ut maw? Leitung gam tuamtuam makaite tawh tukhawm khawlkhawm a thucin thutang a kikum thei makai teel ni.

More: Zomi Gamvai Ngaihsutna ah ka Lunggulh Thu ~ Zam Thuam

Ei’ teelna tantan i tunna ding ei mah in lam a sial ding ihi hi. Tanau vai lel a mun kipia makai i buaipih khak leh a sepna ah zong a beh a phung, a tanau vai ciang tawh ong buai lel ding uh hi. Ei’ teel ding ahi hi. Bang/Kua teel ding? Bangci teel ding? Pau Khat Suan