Gamsung ah vompi (bear) tawh Selfie akizaihsawm pasalkhat vompi in phuailum

Gamsung ah vompi (bear) tawh Selfie akizaihsawm pasalkhat vompi in phuailum

Gamsung ah vompi (bear) khattawh Selfie photo akizaihsawm pasalkhat vompi in phuailum cih NYPost pan kiza hi. Tua vompi ii phuailup athuakpa pen amin Prabhu Bhatara kici hi.

Prabhu Bhatara pen khuakhat ah mopawi siimin apai hi a, aciahlam ciangin SUV mawtaw khattawh midang mopawi siimte ciahpih in mawtaw ahawl ahihi.

Lamkal ah dailensuak (Toilet) ahih manin gamsung munkhat ah mawtaw khawlsak hi. Tua akhawlna munpen India, Odisha State, Nabarangpur District sung ahihi.

Gamsung ah dailengding in apailaitak in vompi aliamkhat mukha citciat hi. Taisan ziauding cih sangsik in, Prabhu Bhatara inzong Mobile Phone lakhiapah in, Photo zaihpah hi. Photo azaih mawkmawk bektawh lungkim zolo in, tua aliam vompi tawh Selfie kizaihkhawm dingin vanehphei sawnsawn hi.

Tuabangin anehphei laitak in aliamciplel ci’n aneumuh vompi in nabawhphei in, nalencip in naphuaigawp hi. Tuabangin vompi in aphuaigawp laitak a mawtaw tuanpih te’n Video Record nabawlkha uh a, tua Video pen Social Media tungah ki thehzakpah zihziah hi.

Video sungah vompi in mipa pen lencip, phuaigawp, leitawh satna, akhetawh tuan cihbangin nasuamgawp hi. Mipa pen taikhiasuak dekdekthei himahleh akhutpan vompi in mancip, lehkaihzel in phuaigawp hi. Ageinai panin alawmdang te’n otsan in, kutsangawp himahleh tua vompi in bangmah olmawhlo in, Selfie aki zaihpihsawmpa bekbekmah buangawp hi. Ui khatinzong hutsawm in, ageinai ah naknak himahleh kuamah in honkhiazo tuanlo hi.

Forest ranger Dhanurjaya Mohapatra kicipa in agenna ah tua mipa pen vompi in aphuaigawp khitciangin tua aphual mahah sisuakpah hi ci’n genkhia hi.

India, Odisha State sungah Selfie kizaihsawmna hangtawh misi pen December kha khitzawh athumveina hita hi. December khasung in kum 50 aphakhin pasalkhat saipi (Elephant) tawh Selfie aki zaihsawmleh saipi in na tuancilgawp in sipah hi.

Tua December khasung mahin adang khangno khatzong saipi (Elephant) mahtawh Selfie aki zaihsawmleh saipi in na tuancil in sihlawh leuleu hi.

Tu’n vompi aliam khatin Selfie aki zaihpihsawm pasalkhat na phuailum leuleu hi.

More: China ah ganhing khawina asimlutsawm khat Sahang in na petlum

Behlapna: Vompi pen aliam (wounded bear) kici a, aliam ahih manin alungzong atom mahmah laitak hikhading hi. Mihing ganhing tepen ihdamloh, ih ngaploh ciangin ihlung tomthei phadiak a, ki maitai khollo hi. Tua ngaploh maitai zawhloh kawmkal ah Selfie kizaihkhop dihdih dingpen kua utmawk mahding? Vompi inzong hihpa tawh Selfie kizaihkhawm mawkleng, ka damloh kaliamna Photo teng Facebook tungah hong khahkhiat sakding ci’n aheh asuakgawp ahih namel. (pun intended)

Tuamah bangin zato sungkhawng ah natveh in apaiciang cina damlo khawngtawh Selfie aki zaihkhawm citciatnuam sese pawlkhat omthei hi. A ut aomphial zongin, adamlo a ngaplo, abuahbaang cina pawlkhatte Photo kizaih dihdihding ki utmasa khollo, ki lunglut dihdih khollo theihi. Na cinaveh pen vompi hileh….. Sawltak #zomidaily