Sangnaupang khatin asiapa atuatgawp laitak Video ki thehzak

Sangnaupang khatin asiapa atuatgawp laitak Video ki thehzak

Japan, Fukuoka City sung aom sanginn khatah laihilh laitak in sangnaupang khatin Mobile Device zang ahih manin, sangsia pa’n zangkei in, sengin acihleh tua sangnaupangpa hehmahmah cimawk hi.

Sanginn Classroom sungah laihilh laitak ahih manin, alawm midangte anawngkai sakloding in sangsiapa’n kambektawh akhaam ahihi. Ahi zongin tua sangnaupangpa pen hehmahmah a, sangsiapa anungpan in suigawp cimawk hi.

Tua sangnaupangpa pen kum 16 aphakhin khat hi a, a siapa abawlsiat laitak Video kizaihkha citciat ahih manin, tua Video Clip pen Social Media tungah ki thehzakpah hi.

Tua Video Clip sungah sangnaupangpa’n asiapa ii azadang tuaksak masa hi. Azadang nihveikhawng atuatsak khitciangin atawbo zong tuatsak in simmawhbawl mahmahmawk hi.

Akhe bekthamlo, akhut tawhzong sangsiapa tumphei in, tuakhit ciangin agawlpan mansawnsawn hi. Tuaciang in sangsiapa’n deihtak a otsan ciangin khawlkiksam hi.

Hihbang in sangnaupang khatin asiapa abawlsiat “Assault” laitak pen sanginn Classroom sungahzong adang sangnaupang adim zihziah ahihi. Sangnaupang khatin Video nazaihkha in, LINE Messaging App sungah aki khahkhiatna panin leitungbup ii muhtheih dingin hongki thehzak hi ci’n Huffington Post Japan te’n genkhia uhhi.

Tuabang in sangsia khat zahtak hetlo in, abawlsiatgawp sangnaupangpa pen Japan Police te’n mankhiapah uhhi.

Japan te thukhun sungah Teachers te’n sangnaupang te bangthu bangla ahi zongin khut ngakkhuan omlo cimawk hi. “Under Japan law, teachers are not allowed to physically hurt students under any circumstances.” Tua hangin sang sangsia pa’nzong bangmah athukkik theilo hihtuak mawk hi.

More: Internet zangsaklo ahih manin sangnaupang khatin anu temta tawh satliam

Tulai sangnaupang tebel lungkhamhuai mawkmah ei. Sangsia te’nlah satkhuan, khut ngakkhuan omlo cimawk. Sangnaupang te’n sangsia te zahtak nawnlo, thusim nawnlo semsemtawh kibang tamawk hi. Leitung bangzahta in asiaphial zongin ei innkuansung ciatah ih tate asiatloh nadingin, aneutung akipan Pasian thutawh pantahding Zomi te’n hanciamni….. Sawltak #zomidaily