All The World’s A State… W. Shakespeare (Zolai)

All The World’s A State… W. Shakespeare (Zolai)

Leitung i cih pen Limpiahna mun STAGE hilel hi!
A sunga teng mihingte pen kineihtawm siamte hilel hang a,
STAGE ahih mahbangin LUTNA leh PUSUAHNA zong ompah hi.
Tua ahihman in mihing a piang khatin hun tuamtuam nei hi.

Tuahun tuamtuamte pen Sagih pha a,
A khatna ah Naungeklai hun ahihi.
Tuahun sungin amah a kemnu angsungah nuizel kap zel,
A kihhuai na tampi lak khia hi.

Tuakhit ciangin a phunciak naupangno hong hito leuleu a,
Zingsang sim sangkah ding sawlsawl kul in,
Ut lo pipi in a sangthung tawh sumkuang lampai bangin,
Manlah lotak in leh phun kawmkawm in sanginn lam zuan den hi.
Tuakhit ciangin khangno hong hita hi.

Lawmngaih tawh hong buai pah in,a lung hong leng a,
Kammal hoih nono gawmkhawm in laa hong phuak hi.
A zawlla ngumngek phuah teng tawh a lawmngaihnu lungkimsak ding hanciam hi.
Tuahun hong beiciangin Gam leh Lei itna lungsim hong nei a,
Paltan va tum in, a khauh theithei in kam hong kiciam hi.

A mukmul leh a khamulte bang mite aa tawh hong kibang lo pah hi.
Min leh Vang deihna tawh hong kidim a,
Thuneuno khat zong thulianpi hong suah in,
Kilai leh kitot ding ngaihsut belin hong nei hi.

Paakpalh banga guai ziau thei minthanna a deihman in,
Thaupi thanuneu mai peuhmah ah tai sawm ngiat lo zawzen hi!
Tuabang hunte hong ven ciangin a theihtawm pilna suang in,
Thuman thutak tawh hong buai leuleu hi.

A gil bang tuisak sim pian in, kizep kipuah lam hong thupisak semsem a,
Pil hong kisa in, hak pian gepguap den zawzen in,
Puam den pian a, nuih nuih khong thupi hong sa nawn lo hi.
Tuabanga a kipilsak hun hong ven ciangin,
A kumzong hong ham ta in, a tuan hong tual a,
A ci a sa tezong nidang bangin hong dim phitphet zo nawn lo hi.

A bawmbi khempeuh hong kikol gai ta in,
A mitlimlangh zong a nak dawnah hong tu veuvau ta hi.
A melhoihna teng hong bei in, a lungsim tha zong hong hat nawn lo hi.
A awsuah zong nidang zahin ngeih zo nawn lo a, a aw ii vang hong bei ta hi.

Hih hunsungin amah pen mite nuihna, midangte ciamnuih bawlna khat hong suak ta hi.
Tukbel tep tawh hong lungkim ta a, a lungsim pen naupangno lungsim tawh hong kibang ta hi.
A Sagihna leh a Tawpna hun sungah hong tun ciangin,
Naupangno zong bang zo nawn lo in, naungek hong suak kik ta hi.

Zun leh ek siak sak hong kul ta a,
Ha nangon zong nei nawn lo in, lim asak khat zong om nawn lo bek hi lo,
A mit zong hong mial ta ahih manin leitung nuntak hong cimtak mahmah ta hi.
Hih hunsung in STAGE khakna puanpi hong kiatsuk ding bek a ngak hi ta hi.!!!!!

Francis Lamthang