DASSK le mipi kimuhna ~ Lian Tuang

DASSK le mipi kimuhna ~ Lian Tuang

19 Febuary 2020 ni Tonzang khuapi a State Councellor le mipi kimuh khopna thu tawh kisai muhna tawmno khat gen nuam hang.

A taktak in gam makai gam lutangpite le mipite kinai tak le kikol takin kimuh theihna pen NLD kumpi hun ciang bekin a om pan ahihna I theihsa tek ahi hi. Hih pen a lungdam huai mahmah khantohna lianpi ahi hi.

Tonzang khawmpi ah zong thuneite thusunna banah mipi lam pan thudotna zong hoih tak ki honga, kidong ziahziah kigen ziahziah in thupi mahmah hi. A kidong thute zong thupi thei mahmah a, a kisam le a kul vive teng mah ahi hi.

Dotna sungah kidong limlim dingin ka lamet mahmah thu nih khawng om a, ahih zongin tua thute ong gingkhia mel lo ahih manin ka lung khat nuam mawk pong hi.

Tua thunihte in
1)Chin state budget hawmna le khantohna lam nasepnate ah, Tedim Tonzang Cikha in midangte ngah zah a lang i lang nangawn I ngah zawh lohna thu ( mi ngah zah ngah ding cihna hi loin, ei ngah dinga kilawm zah ngahna ding )

2)I gam sungah ong pemta pak / ong lengla meiteite in gammite ong thusim het loin amau ut bangin gamta in sungtum pusuak ahihna thu

Hih thu nih pen ei sung tengah I buaipih mahmah le i zakzak sa thu vive ahih manin gam lutangpite kiangah lunggulhna deihna kigen hamtang dingin a lamen ka hi hi. Bang hang cihleh hih bangin suakta tak le kikol takin gen theih dot theih nading hun manpha pen om mengmeng het lo ding cih pen i theihkim ciat ahi hi.

Mipi lam pan gelna hanciamna om gige ahih hangin thunei lam pan dalna khaktanna khat peuh om ai tam maw ahih keileh ei mipi mahmah in tua dan thute thupi sa khollo zaw maw, ahih keileh phawk kha vat lo maw ka cici hi.

Ngaihsut behna

Budget zekzia tawh kisai in NLD kumpi hun, Chin state budget zekzia a huampi in I et ciangin policy le planning tawh pai tangtang kholloin a phul zo, a vil zo peuh in a sawkgawp pian tawh kibang hi. Tua ahih manin hih bangin bangmah I ngah mel loh pen thu dangpi na hi loin ei ma siam lahna peuh zong a na hi gige veve mai tam maw ka cici hi.

Tu ni ciangciang Tedim Tonzang Cikha in I ngah sunsun budget le hamphatnate pen a thutuam dang bangmah om loin a kitanghawm teng ciang hi zaw hi.

Tua bang limliam kawmkal pan hih bangin kumpi budget zekna le thuneihna lamah lamah I lawhcin kholloh pen minam vai khawng sa lailai lehang kilawm ka sa hi.

Ataktak in hih bangin i veng i pam tawh kitel khial dekdek in, sepna bawlnate ah i lawhcin theih melloh pen minam vai na hi khin sam loin Quality neih le neihloh khawngin zong thu tampi na genzaw leh kilawm ka sa hi.

Quality thu I gen ciangin kei mahmah a kipan, mipi numei naupang banah MP le kumpi thuneite dong a ci nuam ihi hi. Tua banah khat le khat khut kilenin mapanna sepkhopsiamna le kizahtaksiamna zong a ci nuam ihi hi. Lian Tuang