Russia te Parliamentary Election ah Putin’ Party in Gualzawhna lianpi ngah

Russia te Parliamentary Election ah Putin’ Party in Gualzawhna lianpi ngah

Russia te Parliamentary Election ah Putin’ Party in Gualzawhna lianpi ngah, President 4 vei a tuhna dingin lametna ki behlapsak

September 20/ 2016 – Russian parliamentary kiteelna ah vote 93 % kisim khin ta a, President Vladimir Putin’ party United Russia in Duma (Russiate parliament min) ah tutna sehli suah sehthum, tutna 450 lak panin tutna 343 ngah uh a, Putin in Russia gamvai tawh kisai-ah vangliatna leh thuneihna a neih nakpi takin khangsak ding hi.

Tua banah president li vei tuh leh a cin kik theihna dingin lametna nakpi takin kibehlapsak hi kici hi. Mee (vote) a tamzaw kisim khin ta a, 76% ngah dingin ki-ummawh ahih manin Putin in a beisa kum 16 in President a let cil in a phuankhiat United Russia party in gualzawhna a ngahte lak panin a lianpen ahi hi.

United Russia in majority mee a ngah lak panin a tam pen dingin kilamen a, Putin gensia leh langpangte panna pen pan’na kician lo man lo hi cih kitel a, Russia mi ten Putin a muanna uh kip mahmah hi cih kilang hi ci-in Putin’ spokesman in gen hi. Liberal opposition party ten a beisa in tutna khat bek – Dmitry Gudkov’ tutna ngah uh a, tu tunga kiteelna tutna khat beek ngah zo lo uh hi.

Vote khia pen 2011 kiteel in 60% hi a, tu kumin 48 % (per cent) in vote khia a, mihau diakte’ teenna Moscow leh St. Petersburg ah vote khia tawm hi kici hi. Mr. Putin in United Russia campaign staff -te kiangah sum bawlna lamsang a kiat hangin Russia makaite mipi ten hong muang lai uh hi cih kilang a, Ukraine in Russia tungah sum bawlna gakna/khalna (sanctions) hong bawl khum manin tu kumin 0.3% in kia zo hi ci hi.

Putin in mipite haksatna hamsa hi cih kimu a, haksatna tampi beisakna ding na kisem khin nai lo hi. Ahih hangin hih bang gualzawhna kingah ahih manin nakpi takin nasep hanciam ding kisam lai hi ci hi. Putin’ naseppih leh a huh ten hih gualzawhna hangin 2018 president kiteelna dingah lametna lianpi om hi a cih hangin Putin in president li veina ding a tuh leh tuh loh ding pulak nai lo hi. 2011 kiteelna ah Putin’ party in tutna 238 bek ngah ahih manin Russiate upadi (constitution) laih zo lo uh a, tu-in puahphatna bawl-a laih theihna ding hun lem ngah ta uh hi.

Kiteelna results kipulak khinsate lakah Communists party in tutna 42 ngah in, a nihna in pang a,a thumna ah LDPR party in tutna 41 ngah a, a lina ah Left-of-Centre Just Russia in tutna 21 ngah hi. Mordovia kiim-ah mi khatin vote khat sanga tamzaw a khia om hi cih a kigen hangin Finland parliamentarian leh Organisation for Security and Cooperation in Europe (OSCE)-te’ Special coordinator Ilkka Kanerva in kum dang sangin ki-ukna leh kiteelna ah thuman kizang zaw hi ci-in gen hi. Reuters/ Thang Khan Lian