AA te Chin State sungah agamtatna uhtawh kisai tomcik kuppihna

AA te Chin State sungah agamtatna uhtawh kisai tomcik kuppihna

Guai AA (Arakan Army) te leh Kawlgalkapte kidona hang in athuak mipite (Internal Displaced People) huhtheihna aomloh hangh, dahpih mahmah hangh.

AA te sang bel Palatwa a unaute tawh sisan in kinai zaw hihangh. AA te gamtatna deihlo a, amawh paih Chin kipawlna hon khat leh Zomi Kipawlna hon khat a makaite tawh Sisan kinai zaw hihangh. AA ten zong banghang Chin State sung a operation hong bawl uh hiam cih anung ah thu tampi om ding hi. Tua lam ah zong Zakhai Minamte om in 2015 Kiteelna ah zong mun khat zo uh hi. Hihbang ah Geo-Politics leh buaina hon khat tawh hun a zangh toto hihangh.

Hih buaina in Zomite bangthu hong pia hiam cih leh Tonzang Myonee a, Meitei Thautawi leh Meitei atengte, Bengciing te in nikhat niciang Zomite hong buaisak mahmah ding uh hi cih mit a muh kilkel hi. Atam luatma uh ih nawkkhiat pak kei leh hihbuaina eikiang hong tung ding hi.

AA bektham loh Zakhaite Chin State ah a teng uh phawk huai hi.Zakhaite leh Meiteite ih genkakna ah Zakhaite pen Kawl gam ah tualsuak minam ahihman in ututna vuah teng thei hi. Meiteite pen Gamdangmi hong lutsim uh, Zogam munkhat kekkhiat sawm cih kilangh hi.

Ahihhang

Politics Standpoint enleng AA te dinmun panpih zoleng panpih luat ding hi. NCA letmat thu CNF te Agreement pen Chin State sung ah Kumpi Galkap simloh Galkap dang omsak lo ding cih zong kihel hi. NCA pen enleng kilemna hong tunlo ding cih hi. Ka gengensa mah bang in 2015 Oct 15 ni a NCA in, Mualmi Thau tawite phelnih suah hi.

Tun enziau leng Kawlkumpi in ih deih kiukna hong pia nailo cih muh gige ahihman in AA te Politics Standpoint dik kasa hi. AA te pen Northern Alliance ah pawllut leh Galkap thakhauh khat hi lailai hi. NA a omteng in AA gamtatna mawhpaihna apiak uh tuni ciang dong kimu nailo hi.

Kawl Kumpi langhpang a adodote gum ding maw, alawmte taisan a Galkap Kumpi tawh mapangte gum zaw ding cihpen, nang ngaihsutna leh nang khensatna hi a, tuapen nang Politics Standpoint tung ah kinga hi.

Lungdam
Cin Lian Khai (Zogamkhaino)