Malaysia, PJ vengsung ah mawtawhawl 2 akitotna Video ki khahkhia

Malaysia, PJ vengsung ah mawtawhawl 2 akitotna Video ki khahkhia

Malaysia gamsung ah Pickup Truck Driver khatleh Sedan mawtaw Driver khat akitotna Video Clip pen Social Media ah ki khahkhia in, ki limet mahmah hi. Petaling Jaya vengsung ah nungkalsung in thupiang hi a, tua Video Clip pen 1,316,521 Views veibang ki enkhinta hi.

Video Clip pen Minute 5 sungkhawng sawt a, Sedan mawtaw sungah akithuah Dashcam panin Vide Record akibawl ahihi. Tua Video Clip pen athuakkha Sedan mawtaw aneipa in ama Facebook tungah akhahkhiat hi in, ki limet mahmah, Comment kipia ngeingai hi.

Video Clip sungah July 26 ni thupiang cih kimuthei a, Sri Damansara Industriral Park sungah kici hi. Video akipatna ah Pickup Truck pen veilam “Left Lane” tawnin apai hi a, Sedan mawtaw pen taklam “Right Lane” tawnin apai ahihi.

Pickup Truck pen themcik amailam taklam ah akiheiding tawh kibang ahih manin, Sedan mawtawhawl penin Horn tumsan hi. Tua Horn atumsan pen Pickup Truck hawlpa hehmahmah a, nungdelhkik in Sedan mawtaw amai ah tamveipi Brake sikvatvat in, amai ah ahawlsuak theihloh nadingin nawngkaisak hi.

Sedan mawtaw pen veilam ah kihem in, makhelh a, taisuakthei himahleh anung panin Pickup Truck in delhkik veve in, Sedan mawtaw ii amailam ataklam nawkpheisak leuleu hi.

Video: A video clip of an altercation between a pickup truck driver and a sedan owner in Petaling Jaya over the weekend has gone viral on social media. It is understood that the aggressive 4×4 vehicle driver has been tracked down and arrested over the incident.

Tuakhit ciangin mawtaw anihin lamnawl ah khawlsaktuak uh a, mawtawhawl te kumkhiatuak in ki kamnial, kitawng uhhi.

Aki kamnialkhit uhciangin Pickup Truck Driver papen amawtaw sungah lutkik vingveng in, thakhatthu in amawtaw pen nungkiksak in, Sedan mawtaw ii amailam taihsak leuleu hi. Khatvei tawh lumkimzolo in, anihveina nungkik in ataihsak ciangin Sedan mawtaw sungah numei khatbang kap in awngkhia buabua hi.

Tua Pickup Truck (4×4) ahawlpa pen taikhia vingveng himahleh Police te’n asawtlo in mankhiathei uh cih kiza hi.

More: Forklift hawlkhat in mawtaw tampi ataihgawp laitak Video ki khahkhia, mi 2 si, 10 valliam

Video Comment nuai ah atamzaw in Pickup Driver pa ki mawhsakciat a, agamtatzia pen gitlohvai kicitek hi. Ahi zongin pawlkhatin Sedan Driver pa mawhsak uh a, amasa in Horn tumsak sese keileh hihbangdan buaina piangloding acizong om uhhi. Sawltak #zomidaily