Computer leh Khuttawi Phone zatdan kidawm ni

Computer leh Khuttawi Phone zatdan kidawm ni

Hih tagel pen I gam le I minam sungah hong lut hun hong tun hun leh aki limzat sawt nailo hi. Khuttawi Phone (Mobile) bang pen Kum 2005 in Lamka leh Aizawl bangah mi tangpi gen loh inn lusi ah a neilo tamlai hi. Kawlgam ah bel genna vet omnailo cimai ni. Ahi zongin I paunak khat ah “hausa ziak in kuangzawn ban” acih bang khat in India te hangin Manipur leh Mizoram tawh kinai a tengte in 2010 kim panin nakzatsim mahmahta hi.

Kum 2007 Chennai (Madras) ah na kasep lai-in ka seppih ka lawmte khat in Lamka aom a cih simsimnu ading Phone khat leisak hi. Nikhat acih simsim nu in a cih simsim pa hopih nuamlua zaw hiding hiven a hopih theihna dingin recharge card lei-in a lupna lukhamnuai ah a phone leh a card koihkhawm hi. Ka lawmpa in nikhat hopih in, “bangci hong hopih ngeikei sicia” ci-in adot leh a lawm ngaihnu in ka balance lei abangci aide aw, ka phone ah lutthei mahmahlo ci-in gen hi. Ka lawmpa in “bang naci thun aita acih leh a lutdinga ka lukhamnuai ah zan tawntung ka Phone tawh ka koihkhop hiven lutthei mahmahlo” ci-in gen hi. Ka lawmpa zong anuih zalua hiding hiven kei hong hilhsawn hi.

Khuttawi Phone pen zan I lupciang in I lukhamnuai khawngah koih ding gen loh I pumpi tawh kinai lua a koihlo in a tawm pen pi 6 ki hal a, koih dingin mipil pawlkhat te’n gen uh hi. Mihau pawlkhatte bangin eitawi khuttawi Phone te hahzat hetlo uh hi. A tate uh kum 18 nuaisiah peuhmah zangsaklo uh hi. I pumpi tungah siatna piangsak thei hikei leh bel tua cih hetlo ding uh hi. Bang hang hiam cih leh pawlkhatte in face book a kipan a sunga om lim leh a tuamtuamte lunglut in naupang pawlkhat bangin nu le pa gamtat hoihlona limte leh thusia lasia tuamtuam mukha uh ahih manin a lungsim uh nawngkaisak in laisim nuam nawnlo, nasem nuam nawnlo zo uh hi.

Computer zong I neih tungin sun le zan cilo in I paunak ah “tagah nawimu kawlgit…..” acih bangin ki khoihnuam thithe mawk hi. I neihma in mi a, I muh khak bek zong, I va lawnkhak bek zong kinuam in I lawmte kiangah ki sialnuam pianlai hi. Cikha Sang ah Computer hong tun tungin a en dingin Siate’n khat khat zong hi zolo khan khat khit khan khat hong ki khelsak a, mi kitam pian ahih manin mi phuzolo te’n tel muhzolo lawng khalo uh hi. Bang hang hiam cih leh tulai a I zatte dan hilo in gol mahmah in puan tawh ki tun vialvual mawk a, leitungah aki bawl masa pente pawl hi leh ki lawmphial hi. A hoih khat hi leh bel ei gamdawnlam ah hong tung hetlo dinga zong kimu khaloding na hizel hi. Tua pen amai ah tu-a ki mekkha zong hilo, khutme tawh tawmcik Siate theih loh kal a, a khoihkha te’n ken khoihkha ci-in lawmte kiangah ki gen ngeingai nuamlai hi. Tuhunteh bel leitung khantoh pen Kawl galkap te’n zong khaktan zolo, nangzolo ahih manin mi tampi in neizota in sun le zan cilo in ki khoih ziahziah hi. Pawlkhatte bang, lunglutlua ahih manun Sang laisim ding donman nawnlo, innkuanpihte tawh ann nek hun, luphun ki tuaknawnlo hi. Meeting paiding nasep ding khat peuh zong hun manin ki pantheilo biak-inn paiding hun nangawn hong mansaklo thei hi.

Tua hi-a, hihta gel zatsiamleng hoih mahmah napi in zatsiam keileng mit natna a kipan lungsim dam lohna pumpi damlohna leh natna tuamtuam aki ngahlawh thei ding ban-ah I ngimna I tupna mun nangawn hong tungsak zolo thei namkhat ahi hi. Tua bek hilo in Innkuan sung nupa kal, tate tawh kal zong buaina hong piangsak theiding ahi hi. A khangto gamte ah zatdan gen loh I tut dan Computer tawh I ki halding tan nangawn omsak uh hi.

Computer leh Khuttawi Phone pen a zangsiamta dingin pilna ngah behna, sum le pai ngah behna leh khantohna tuamtuam tampi piangsak a, a zatsiamlote a dingin natna satna lungkham sinkhamna leh a tuamtuam piangsak thei ahih manin a hun le amun tawh kizui, ki tuak in zatdan siamsawm ni. Tua hikei leh khangno mahmahlai kum tawm mahmahlai in na mit siading a, natna gil ngahin na ngimna tungzolo in kum sawtpi na nungtakei ding hi. Na Computer zatdan leh na Khuttawi Phone zatdan kidawm pha mahmah in. 2003 kum Kota,Rajsthan, India ah ka Sang kahlai mangkangte pitek khat kum 70 valta in lai hong hilh theilai, mitlimlang zanglo. Tuhunteh Zomi naupang kum 10 zong pha nailo a, mit limlang bulh leh natna tuamtuam nei-a, Sangkah laisim gina zo mello honkhat omta a dahhuai mawhlo ding hi.

Khaibawi