Yangon hawhna (Nov 23-December 3, 2017) ~ Dr. Ngul Khan Pau
Tutung Yangon ah Dimnu tawh Sia Zambawi leh Caleb Overstreet-te makaihna tawh Marriage Enrichment zang dingin ka zin thei uh hi. Nov. 24 ni-in Siapi Enno tawh innkuan leh nupa thu tawh kisai amuhzia limtakin ka kiho thei uh hi. Ama ngaihsutna kikuppih thei ka hih manun nuamsa mahmah ung.
Nov 25 Nitak lam (2:00-4:00) Zomi Lungdam Kohna Yangon GZA makaihna tawh hun kizang thei hi. Thungenna ah “Kua-te koi-ah om hiam?” (Luke 17: 11-19) cih ka gen hi. Tua zawh in Grace Assembly Church ah (5:00-8:00) Dr. David Suum makaihna ah “Nupa kal” thugenna hun nih kinei thei hi.
Nov 26 (8:00-10:00) Zing kikhop Upper Room New Life Sia Tual Hau Khup sia sepna ah “How to be great in God’s sight?” (Luke 1:13-17) sung siksanin ka gen hi. Kikhop zawh phet in Naypyidaw dong Sia Tual Hau Khupte mawtaw tawh paisuak ung. Marriage Enrichment retreat ah ko nupa tawh nupa kop 12 pha ung. Mikang pau in Dimnu tawh ni nih sung thusinna ka pia uh hi. Nuam kisa ciat, nupa a suakta takin kikhawl nuikhawm kimu ahih manin kilungdam mahmah hi.
Nov 29 ni-in Yangon ah kiciah kik a, tua nitak Sia Thang Khan Khente innkuan tawh nitak ann ka ne khawm uh hi. Nov 30 ni-in Pu Khoi Lam Thang tawh kimu, nitak ann zong ka ne khawm uh hi.
December 1-3 Siyin Region Baptist MC hong pai thei teng 33 leh YSBC siate tawh mi 42 khawngin thusinna “Makaihna leh Muhkholhna” cih a ni masa sung kipia thei hi. Dec 2 ni-in Kumpi Saul leh David makaihzia kibatna leh kilamdanna, Tuhun makaite kisapte, makaihzia kitelsiam ding kisapna, cih thute tawh thusinna kinei hi. December 3 zing Men & Women leh MC tawh kikhopna kinei a, “Joseph Nuntakna” panin sin ding (Mat 1:18-25) ka gen hi.
Kawlgam Khangto mahmah ahih manin Yangon khuapi sung mawtaw thak tawh kidim hi. Pasian nasemte’n zong amau mawtaw ciat a neih uh ka muh ciangin ka lungkim mahmah hi. 2003 kum a Yangon ka pai masak leh tuhun kilamdanzia pen a sawt loin Thailand sangin khangtozaw ding cih kimu hi. Singapore shopping mall hoih penpen a kigente Yangon ah tua bang tektek om khin zo hi. Gamdang van leh kizepna deih bangin kingah khin hi.
More: Yangon, Pazundaung Township sung aom lampi 15 te One-way in kilaihding
Tulaitak i kisap: Company hoih pipi hong lut a, Mikang pau siamte’n $ 2000 bang kha khat ngah uh hi. Yangon ah US $ 2000 khasum ne leng, gamdang pai ding kingaihsun nawn lo ding hi. Gamdangah tuazah kiim khawng mah a tamzaw in tulaitak i khasum hi kha ding ahih manin Kawlgam ah inn mun, gam lei zote’n hanciam ding hi. A sawt loin “The Five Asian Tigers” (Malaysia, China, Japan, Korea, Singapore) ah lut dingin kigen khin zo hi. J.M. Ngul Khan Pau
Comment piaknop aomleh...