Zawhngeu kuan long oksak ding ~ Peter Suumpi
Khat vei lai in khuapi khat aa inn khat ah zusa tam cihtak in tam hi. Zusa te suntawh zantawh langlua ahihman in inntek te in zawhngeu khat hong khawi uh hi.
A zawhngeu khawi zawh uh aa kipan zusa tampi tak hong nuamtuam hi. Inntek te ahileh lungdam lua kisa in zawhngeu zong avaipuak zo mahmah gawp cih ding ahi hi.
Nikhat zusa te in khawmpi khat hong nei uh hi. Tua khawmpi ii ngimna ahileh amau ane ne tua zawhngeu thah zawh nading cih ahi hi. Hih zawhngeu ii galpan ih suahtak theih nading in ngaihsut ciat un ci in zusa makai pi pa in gen hi.
Zusa te in amau ii ngaihsutna ciat khat khat ta in gen uh hi. “Tua zawhngeu in hong matsawm ciangin zusa thang omna lam ah zawl phei in zusa thangah awk leh nidang ciang ei hong man ding om nawnlo ding hi.”
“Hi ngaihsutna pen hoih mah ahihang lauhuai lua sa ing. Tuat kholh lohpi in zusa thang tunma in zawhngeu in nang hong ne leh bang cih ding. Ka cih in ah a-ihmut laitak meitawh hal leng ahoihpen hi ding in um ing.”
“Hi dan pen ei aading zong lauhuaina om thei ding hi. Ka ngaihsut ahoih mahmah khat om. A ihmut laitak in angawng ah long khat ok sak leng cih hi. Tua hileh long ging ihzak ciang ei amanglang in kibu thei ding. Ama hong mat ding zong patauh kul nanwlo … bang ci na sa uh ei …”
Hih ngaihsutna zusa khempeuhin hoihsa in thukim tek uh hi.
“Ih vekin hoihsa in thukim tek ih hihleh zawhngeu kuam long va oksak ding?” ci in zusa maikai pipa in adot ciangin kuamah in dong kiknawnlo hi.
“Hih ngaihsutna nang gen khiat masak ahihciang nang mah vapai pah oo”
“Kei … kei pai ngamlo … adang zusa zong inla paisak in maw … “
Atawpna ah kua man zawhngeu long oksak ngamlo uh ahihman in tuni ciang dong zusa te’n zawhngeu ii matna thuak lai uh hi. Peter Suumpi
Comment piaknop aomleh...