Pilna ~ Hau Sian Cing

Pilna ~ Hau Sian Cing, B.N.Sc.

Pilna tawh inn kilam a , ngaihsut siamna tawh innkip hi. (Paunak 24:3) Tuhun kum zalom 21 hun pen pilna lamah akikhanlawh hun hi a, mipilte in pilna hun (Knowledge age) ci-in gen uh hi. A koimah peuhah pilna mah hong thupi pen ta a, pilna in mun khempeuh phialah mun hong la ta hi. Hih pilna hun sungah pilna dangdangte sangin computer pilna le internet pilnate khanpi-in hong khang hi.

Nidangin nuntak nadingin thagui thatang ngiat tawh gimpi, tawlpi-in na a kisepna munte ah tu-in pilna siamna tawh nisa thuak kul lo, khua-ul zong kaai kul loin na kisemta hi. Tua hi a, tuhun pen Zomite’ adingin zong i pu i pate’ hunlai danin thatang hat kidem hun hong hi nawnlo a, pilna kidem hun hong hita hi. Tua mah bangin zukham-a kitomtom hun zong hong hi nawnlo a, khua le tui khantoh nadingin akimanlah mahmah hun zong hong hita hi.

Tuhun ciangin a koimah peuhah thatang tawh nasepna sangin computer tawh nasepna hong kitam zatzawta a, lokhote in zong thatang tawh kikho nawn loin, pilna vive tawh kikho ta hi. Mipilte in a genna uhah tukum zalom 21 sungah thatang tawh nasepna 5%, Settha tawh nasepna 20%, midangte cialin nasepsakna tuamtuam 25% le computer pilna tawh nasepna 50% bang hiding hi, ci-in gen uh hi. Tua ahih manin computer pilna pen pilna dangte sangin hong thupi zaw semsem dinga, tua pilna i neih theih nadingin i hanciam mahmah hong kulta ding hi. Zomite thatang hatna suanga nasem mi 5% te lakah kihel khalo a, computer pilna tawh tawldam takin nasem 50% te lakah i kihel zawh ding lunggulh huai mahmah hi.

Tu-in Pasian in Zomite thupha hong pia mahmah a, Zomi sungah leitungbup tawh liangko kikim zah phialin mipil misiam a khomkhat hong om sakta ahih manin angtan huai mahmah hi. Tua mei zomin tunai deuh bang ciangin cikmah hunin i zak ngeiloh Zomi Computer and Internet Association (ZOCIA), akici kipawlna khat bang zong hong piangkhia a, hih ZOCIA panin Zomite computer pilna lamah khantoh nading nasepna tuamtuam hong nei uh hi. Tu-in Zomi tawh kisai website 50 val bang kibawl khinzo ta, ci hi. Tua banah Tedim khuapi sungah zong June 19, 2006 ni-in ZOCIA TEDIM BRANCH kiphuan khiata hi. Hihte in Zomite Computer pilna lamah i khantohna teci ahi hi.

Tua banah tuhun pilna khempeuh phial Manglai vive tawh kisinta a, laibu hoih akici khempeuh zong Manglai vive mah tawh kigelh ahih manin Manglai i siam nading hanciam huai mahmah hi. Tua tham loin Mangpau zong leitungbup pau hong suakta ahih manin a kilawm ciang khat beek pautheih hong kul ta hi. Manglai le Mangpau na siam peuhle’ng, kival ngeilo ding hi.

Tuhun ciangin Pasian’ nasemin leitung na i sem zongin pilna i neih loh hong phamawhta hi. Pilna nei peuhle’ng i nasepnate-ah mite’ neumuhna le simmawhna kithuak lo zawdeuh ding hi. Tuamah bangin koimun, koimunah makai khat i hih limlim nakleh mite i makaih zawh nadingin pilna i neih hong kul hi. I makaih mite sangin i pilzaw kei phial zongin amau nuai-ah i om khak hetloh ding thupi hi. Tua ahih manin makaite in pilna kilawm ciang khat i neih kei leh kuamah in ei’ makaihna hong mang nuamlo ding uh hi. Tuhun teh pilna neilote khangkhat a zekai khin hi a, pilna i neih kei leh damdamin mival peuh kisuakkha ding hi.

Pilna pen a huampi-in Lai pilna (Academic), Lungpilna (Wisdom) le Thu theihna (Knowledge) ci-in nam thumte pen a thum mahin pilna vive mah hi a, simmawh tuam ding le paih tuamding om tuan lo hi. A thum mahin deih ding le neih ding ahi hi. Hih thumte atom kimin ensuk dih hi.

1. Laipilna (Academic)

Hih lai pilna pen sin teekteek kul a, sin loh tawh kingah thei lo hi. Hih pen Zato lam pilna, Computer lam pilna , Internet pilna…etc cihte dan ahi hi. Hih pilna i ngah theih nadingin hun tampi, sum le pai tampi, le khua-ul tampi piakkhiat kul hi. I neih i lam teng a bei banah, leiba thangba nangawn kineihlawh thei lai ding hi (Pau 4:7). Laisinna-ah zong bangteng sin dinga, kum bangzah sung a sin ding cih kiciangtan ahih manin tuadan mah a zawh ciang dongmah sintoh ngelhngelh kul hi.

Thadah manin lamdawt zuihziau tawh hih pilna kingah lo a, lampi ngeina teng mah zui-in hanciam tangtang kul hi. Pilna i sin sungin eima’ pumpi tung mahmah le i bangkua sungah sum le paai haksatna, pumpi damlohna le lai zuihzawh lohna cihte kiphukha thei ahih manin lungkia lo a, thuakzawh tentan ding zong kisam hi.

A thupi penah mihing lampan bangzah takin i hanciam phialta zongin mavan’na le matut zawhna hong pia thei pen Pasian bekmah ahih manin Pasian mah muang a, thunget den ding le Pasian’ deihna bangin nungta a, thuman tawh pilna i zon ding zong kisam hi (Isa 26:12). I laisin ding teng i zawh khit ciangin bangzah taktak thei cih sittelna-in lai kivuan a, i on ciang bekin matutna lukhunelkai (degree) kikhu thei pan bek hi. Degree zong Bachelor, Master le Doctor ci-in a dawldawlin na om toto lai a, a sangpen Doctor ciang dong mah hanciamin sin huai hi.

Lai pilna sungah zong leitung pilna (Secular) le Pasian’ thuthuk pilna (Theology) ci-in namnih na om leuleu hi. A nih mahin thupi tuak a, anih mahin neihzawh nading hanciam huai hi. Pasian’ nasem khat in Pasian’ thuthuk pilna (Theology) a neih banah leitung pilna (Secular) tawh neikhawm zolai leh mite’ muanna le mite’ zahtakna ngah deuh a, tua in kumpi lam tawh kizopna, midangte tawh kizopna le pawlpi sung kiukna cihte ah phattuamna tampi hong pia thei hi. Tua ahih manin a picing, a muibun Pasian’ nasem hoih khat i suahnop leh Pasian’ thuthuk pilna (Theo-logy) le leitung pilna (Secular) te a nih mahin neihkhop zawh nading hanciam huai hi.

2. Lungpilna (Wisdom)

Hih lungpilna pen ciimna zong kici thei hi. Lungpilna pen Pasian mahmah in mihingte’ tungah hong piak thupha khat ahi hi (Job 32:8). Lungpilna i ngah theih nadingin lai sinna le lai vuanna cihte om thei lo a, degree kipia cih bang zong om thei lo hi. Pasian in mi pawlkhatte pianpih lungpilna/ ciimna pia hi. Gtn;- USA gamah University minthang pipi a phuankhia D.L. Moody, Bob Jones, Oral Roberts le Kenneth E. Hagin i cihte bang in laitan gina na nei lo uh hi. Ahi zongin amaute in pianpih lungpilna/ciimna le thugeel siamna cihte na nei kim ciat uh hi.

Mi pawlkhat leuleu, apianpih uh hi loin, Pasian in kul a sakna tawh kizui-in lungpilna/ciimna apiak zong om hi. Gtn;Pasian in Solomon kumpipa tungah lung pilna a piak ciangin Solomon in gam-uk siamna, thukhen siamna le dotna namkim dawnkik theihna cihte nei pah ziau hi (Kum 3:12). Tuamah bangin Pasian in Stephen tungah zong lungpilna a piak ciangin Stephen zong thugen siam pah lel a, ama’ thugente kuamah in nialzo peuhmah lo uh hi. (Sawltak 6:10).

Pasian in Zomite’ tungah zong lungpilna/ciimna hong pia lua cih kimu thei hi. Apiak mite’ pianzia anuai-a bang ahi hi.

• Upadi pilna sin ngeilo napi, thu le la kiva thei mahmah uh hi.
• Engineer pilna sin ngeilo napi, biakinn lim (design) hoihnono suai thei-in, a lam zong siam thei mahmah uh hi.
• Pilna sangpi neilo napi, nasep geelsiamin, makaihlam le vaihawm lam kiva mahmah thei uh hi.
• Laikawi khat zong theilo napi, khangthu suut siamin, lavui tampi suut thei uh hi.
• Solfa theilo napi, la a ngaihnono phuak pak ziauziau thei uh hi.
• Lai Siangtho sinna neilo napi, mite’ dinmun tawh kizui-in hanthotna pia ziauziau thei in, mite’ lungsim zo pha mahmah thei uh hi.
• Mi mit heekzia enin, omdan khawldan siam mahmah thei uh hi.

Khatveivei, laitan gina zong nei ngap kei ci-in i simmawh bawl pian mi pawlkhat, i batlah theih zelna pen, amau laipilna a neihloh zenzen uh hang, lungpilna/ciimna na nei khinkhian uh hi. Tuamah bangin makai tampi in maizumna a ngah theih zelna le amite a makaih zawhlohna pen lung pilna/ ciimna a neihloh man peuh hi gige thei hi. Tua ahih manin mikim in lungpilna/ciimna neih ding lunggulh huai mahmah hi.

Lungpilna pen Pasian bekin hong pia thei ahih manin i deih takpi leh a nuai-a bangin Pasian’ maipha zong ni.

• Pasian zahtakin a sia peel ni. (Pau 9:10; 8:13)
• Pasian pen nambat khatna-ah koihin thupipen sak den ni. (Mate 6:33)
• Pasian’ min pahtawi den ni. (I Sam 2:30)
• Pasian lungdamsak den ni. (Thsia 2:26)
• Pasian’ tungah kiko-in amah sam den ni. (Jer 33:3)
• Pasian’ tungah ngen ni. (Jeim 1:15)

3. Thutheihna (Knowledge)

Thutheihna i cih sungah kha thu le leitungthu a nih mahin huamkhawm hi. Lai Siangtho sungah Pasian in, “Ka mite a thutheihna (Knowledge) uh tawmlua ahih manin kisia uh hi,” ci hi (Hos 4:6). (Manglai le Kawllai tawh zong enkak ni). Christian tampite a picin theih lohna uh le a lawhcin theih lohna uh a hang in a thutheihna uh a tawmluat man peuh na hi gige thei hi. Tuamah bangin mi pawlkhat in khemna a thuak deuhna uh le mite’ simmawhna a thuak deuhna uh zong a thutheihna uh a tawmluat man khawng mah na hi zawdeuh hi. Tua ahih manin thutheihna pen mikim in a deihhuai le aneihhuai mahmah khat ahi hi

Thutheihna i neihtheih nadingin Pasian’ tungah thu i nget banah eimah mahin zong eima’ batzawh tantanin i kan ding le i zon ding zong kul hi. Thutheihna pen a nuai-ate panin kingah thei hi.

• Pasian’ tungah ngetna pan (Thsia 2:26)
• Khangluite’ thuciinte pan (Job 2:26)
• Piteek puteekte’ tung dotna pan (Job 15:10)
• A theisa le a siamsate’ tung dotna pan (II Khang 5:6)
• Thudotpi (Advisor) hoih neihna pan (Pau 11:14)
• Eima’ thuahkhak ngei (Experience) te pan (Rom 5:3)
• Ei’ mai-a sem makai luite’ nuntakzia le sepziate pan (Heb 13:7) – Kim le pam thupiang tuamtuamte pan (Isa 60:4)
• Naupangnote nuntak zia pan (Maku 18:3)
• Zakna pan (Radio, TV, Telephone… cihte) (Rom 10:14)
• Muhna pan (Tadensa, Journal, Magazine, Internet…) (Maku 13:29)
• Midangte’ khialhna pan (Pau 18:15)

Germany Prime Minister khempeuhte’ sungpan Bismarck (1818-1898) in khialhna le genbanna tawm nei pen hi. Ahang a kidot ciangin ama’n a dawnkikna ah, “Mihaite bek in amau’ khialhna pan pilna la a, ke’n bel midangte’ khialhnate pan pilna ka la hi (Only fools learn from their own mistakes, I prefer to learn from other’s mistakes) ciin nuikawm hiuhiau sa-in na dawngkik hi. Hih dawnna pen leitung tangthu-ah minthang mahmah hi. Hau Sian Cing, B.N.Sc. (University of Nursing, Mandalay)