Na ci ngam tadiam? ~ David Tuang

Na ci ngam tadiam? ~ David Tuang

Hun khat lai-in……, tu-in

Hun khat lai-in, duhhop huaihamna leh ang sung thu bek theihna tawh makai ka sem ngei a, tu-in itna, veina leh deihsakna tawh makai ka sem thei ta hi.

Hun khat lai-in, makaite simmawh in a langpan’ den khat ka hi ngei a, tu-in makaite it in ka zahtak thei ta hi.

Hun khat lai-in, kei thu bek thusa in, midangte tawh a kipawl thei lo nu/pa ka hi ngei a, tu-in midangte’ thu zong sang thei-in k kipawl thei ta hi.

Hun khat lai-in, siatna tuamtuamte tawh akidim khat ka hi ngei a, tu-in hoihna tuamtuam tawh zong ka kidim thei ta hi.

Hun khat lai-in, vuih theih khamtheih a nak zat mahmah nu/pa ka hi ngei a, tu-in vuih theih khamtheih a zangh nawn lo nu/pa hong kici ta hi.

Hun khat lai-in, ka pil kasiamnate leh ka neih ka lamhte kisaktheihpih in ka kiliansak a, tu-in tua bangte hangin kisathei nawn loin ka kiniamkhiat thei ta hi.

Hun khat lai-in mite’ sepnop lohte hong kisemsak leh ka lungkim het lo a, tu-in midangte’ sep nop lohte kasep ciangin ka lungkim ngaungau hi.

Hun khat lai-in, muh dah velval cih khawng ka nei thei-a, tu-in muhdah cih bang ka nei thei nawn kei hi.

Hun khat lai-in, a lawhcing a daupai om leh ka haza thei-a, tu-in ka lungdampih thei ta hi.

Hun khat lai-in, kei hong huh hong hehpih teng bekmah huh nuamin, ka hehpih thei bek a, tu-in mi khempeuh huh nopna lungsim leh hehpih theihna lungsim ka nei ta hi.

Hun khat lai-in, keima minthan’ nading bek ka ngaihsun a, tu-in Pasian’ minthan’ nading bekmah thupi kasa zaw ta hi.

Hun khat lai-in, keima phattuam nading bek thupi kasa a, tu-in midangte’ phattuan nading zong thupi kasa thei ta hi.

Hun khat lai-in, mite’n siam hong sa-in hong phatphat ding uh ka ut a, tu-in mite’n ka gen/gelh khiat thute a nuntakpih ding uh thupi kasa zaw ta hi.

Hun khat lai-in, ka gu ngei a tu-in ka gu nawn kei hi.

Hun khat lai-in, thuhoih khat nangawn thusia in kamu thei-a, tu-in thusia khat zong thu hoih in ka la thei ta hi.

Hun khat lai-in hong itte bek ka it a, tu-in hong mudahte zong ka it thei ta hi.

Hun khat lai-in, leitung nate leh mihingte peuh thupisak pen leh lunggulh penin ka nei kha a, tu-in tuate khempeuhte sangin Pasian thupisak zawk leh lunggulh penin ka nei thei ta hi.

Hun khat lai-in, ka pumpi keima neihsa sa-in, ka ut bangbang in ka zang kha a, tu-in Jesu Khris hangin Pasian’ neihsa ka hih lam telta ka hih  manin, ka pumpi keima ut bangin ka zang ngam nawn kei hi.

Hun khat lai-in, a si hi zenzen leng tawntung sihna(Hell) a tung ding ka hi-a, tu-in a si zenzen le’ng zong, Jesu Khris hangin tawntung nuntakna mun a tung ding ka hi ta hi.

“Na ci ngam ta diam?” ci-in, Khazih sungah, David Tuang