Pil sinna tawh kisai Kal (4)

Pil sinna tawh kisai Kal (4)

Pilna khat peuh ihsin teh kal masa pen a khiatna (definition) ciang theihna ahihi. Kal nihna in a deihna theory tawh telna hi-in, kal thumna pen tua thutawh kisai a omsa theory teng khinkhai theihna le kal li-na pen ei tawmin theory thak khat phuang theihna ahihi.

Gentehna:

Democracy thu ih theihnnop leh mikang lai sim thei-in dictionary pan a khiatna (definition) ciang ih tel theihleh tua pen a lunglut dinmun cihciang hiphot hi.

Democracy tawh kisai a theory lampan kigelh laibu te en lehang mai 100-200 a pha laibu tampi omhi. A theory taktak ih etteh a khiatna bulpi kitel thei pan-a, tua pen hun pia-a, a kanngiat te bekin thei panhi.

Democracy tawh kisai theory tuamtuam omlam ih theih khitteh tua theory omsa teng hoihna, hoihlohna, kisap na le pahtak huaina-te tehkak, khinkhai thei lehang bel a siam kisuak ta hi. Hih dinmun pen sin ngiat mah hong kisam tahi.

Democracy tawh kisai theory teng ih theih khitteh, ei gam-le- lei, ngeina tangthu tawh etkak in a mun a mual tawh kizui-in a lemtang thei pending le hun saupi kikhom ding theory ih phuang (akl) teel theileh tua pen a pil taktak kisuak panhi.

Theory hoih khat ih neih lezong mipil misiam dangte kiang va pulak, amau tawh kikum in amau muhna tawh sit, tehkak, puahbeh theih nading in conference tuamtuam, seminar tuamtuam ah ih va sun kawikawi kullai hi.

Tua ahih manin ei-le-ei ih tunna dinmun tel theih huaihi. A lunglut dinmun, a kan dinmun, a siam dinmun, a pil dinmun cihte kitel theih huaihi.

Bang hang mipil hih ding kisam hiam?

US, UK cihte a kipan gam khangto, gam hau ihcih te pen tanglai pekin hun saupi kikhom gam ki makaih zia ding a hoih thei pen dingin mipil te in kum tampi sung geelin gambup vai tawdap hoih (foundation) a puahkholh niloh man uh ahihi. Tudong mah zong mailam ki makaih ziading, gamdang te sang mazan zawk nading kan niloh den lai uhhi. Pau Sian Lian