Inn lamdan tawh kisai

Inn lamdan tawh kisai

Inn i phel ding leh inn i lamding ciang Sipin zum thu i zaksak ding pen khuanu/khuapa te vaipuak ahi hi.

A taktak in cileng Sipin thuneih na huang sungah kilam inn bek hilo dailen-buk, vokbuk, akbuk etc–a tuamtuamte nangawn i lamding ciang Sipin te phalna i nget masak ding kisam na hi gige mawk hi.A hi zong thukhun om bang taktak in kikalsuan thei khin nailo hi zaw hi.

Sipin te phalna omlopi in inn i lam leh sum 20000- 100000Ks dong kigaam in ki khawlsak ding hi.A lam teitei leh nikhat 20000Ks ki gaam ding hi.Tua thamloh in a khawlsak suaknop leh khawlsak thei, a phelsak nop leh phelsak thei cih pen Sipin thukhun ah om hi.Thukhun sungah na khem peuh kim mahmah hi.Zuizo leng i khuasung et lawm mahmah ding hi.

Tedim khuanu/khuapa te’n i muan i suan mithupi tata teng in thukhun telcian mello aa, inn khawng a ut bang un hong lam ziauziau mawk uh hi.

Thukhun kituak lo ci’n zumpan theisakna leh mawk gamtat loh na ding lai vapia leng tangtel sihtan bang kek in, heh balbal lai dep uh hi.

Thukhun om bang taktak in, kalsuan ding hi leng thunei/nasem te a ding lem pen napi mipi in zuizo lo ding hi.A diakdiak in mipil vive omna Tedim ah baih nailo ding hi.

Thukhun a niam thei penpen in neusak aa zuihzawh nading hong kikalsuan pih hi.Inn lam nuamte kikham lo aa khuapi hong tawisang ding a hih na tawh kizui in tha kipia mahmah hi.A hi zong kumpi phalna nuai-ah i lam ding a thupi a hi hi.

Inn i lam ding ciang Sipin zum-ah thu vapuak in hong gen bang un gamta tangtang le hang buaina omlo ding hi.

Kuamah awlmawh lo in kiuilu teisak in naom mawk leh buaina hong tun ciang na lubuk hong tung ding hi.Khuapi sung na tennak leh Sipin zum tawh kisai hamtang cih mangngilh huailo hi. Tedim Municipal