Myanmar, Magwe Region sungah inn 150 meikangtum, mi 890 inn neinawnlo
Myanmar, Magwe Region sungaom Yesagyo Township sungah nung Saturday nitaklam khuasung meikang huaisia mahmah hi. Tua meikatna hangin inn bekbek akigawm in 154 bang kangtum a, mi 890 tak innneilo “Homeless” dinmun tungziau hi ci’n MMTimes leh kumpi thuneite’n zanni in genkhia hi.
Yesagyo Township panin Parliament Member khat ahi U Tin Thaung in agenna ah hih meikatna hangin khuasungmi asi aliam kuamah omlo cibilbel hi.
Ahi zongin khuasungmi 890 bang innneilo dinmun atungziau himawk ahih manin, tuate ii omnading huhna tampi kisam cihi.
Video: Fire burns 150 houses, leaves 890 homeless
Tuabangin khuasung meikang athuakkha te lakah sangnaupang 40 val bangpen tukum in Tan 10 laivuanding uh ahihi. Kumpi laivuan “matriculation examination” Tan 10 laivuanding pen March 07 ni ciangin akipanding hita hi. Tua laivuanding te bangmah nawngkaina aomloh, akipelhloh nadingin ki hanciampih masading hi ci’n U Tin Thaung in genkhia hi.
Tulaitak khuasung meikatna hangin cimawh dongtuak tepen ageinai aom Thit Taw Gyi Taw khuasung High School ah ki omsakphot cihi.
Yesagyo Fire Department te genkhiatna ah hih meikatna pen anhuanna “Cooking Stove” panin akipankhia ci uhhi. Meikuang pen khauhlua mahmah, huaisialua mahmah ahih manin meiphelh Firefighters te’n nai 6 val abuaipihkhit uhciangin phelhsiangtheipan uhhi.
More: Myanmar, Kayin State ah Electric meikhau panin datlaih sakkha in mi 5 takin sihlawh
Hih meikatna hangin supna akigawm in K69.3 million (US$ 51,755) bang phading hi ci’n thunei te’n genkhia hi. Myanmar gamsung ahzong tunai lamlam ciangin Bomb kitam, galkido, Bank ah damiah lut, guta damiah tamsemsem cihte bekthamlo, khuahun mahmahzong siasemsem in zinling, mencim, innkang cihbang Natural Disaster tuamtuam hongki nawhzak simsimpian hi. Sawltak #zomidaily
Comment piaknop aomleh...